梁諾妍谷肥儲脂肪極地求生
模特兒梁諾妍今日凌晨二時三十分在阿拉斯加展開500公里「冰極長征」慈善跑，9日長征旅途中冇得沖涼，本來身形弗爆的她為應付比賽，起行前刻意喪食谷肥自己，希望盡力完成今次善舉。
梁諾妍（Inez）在「冰極長征」慈善跑中擔當領跑員角色，跟視障跑手梁小偉（Gary）及香港首位極地馬拉松大滿貫得主盧俊賢（Steve）組成三人小組，昨日她越洋受訪時說：「心情都緊張，我哋一Team人一條心。」
瞓雪地冇得沖涼
他們要在9日內完成500公里賽事，Inez說：「我哋冇得沖涼，只可以抹身更換內衣，每日太約瞓四個鐘，希望可以盡快完成，每個Check Point（檢查站）由40公里到最遠70公里，去到我哋就要除低晒所有嘢，檢查身體狀況，睇吓有冇凍傷，再補充物資。」
由於每日大部分時間暴露在風雪下，所以Inez的面部、腳板底都要黐上運動貼布作保護，她說：「我哋每人用3,000蚊租咗個睡袋，可以喺冰天雪地下瞓都冇問題嘅。」Inez本來有110磅，但肌肉多過脂肪，為了應付今次慈善跑，她於出發前個半月開始努力增肥：「我磅數唔夠，所以要喪食，喺比賽時我絕對需要脂肪嚟消耗。」
野外用樹枝食飯
早兩日他們上野外求生課程，要在零下幾十度的地方生存，Inez坦言手指腳趾凍到僵了：「但依家識得點樣變暖，學咗用樹枝生火，用白電油開火煮嘢食，試過煮脫水飯、脫水芝士意大利麵，但搞笑嘅係我哋冇買匙羹，頭兩日要用樹枝嚟食，感覺好Wild（野生）。」開跑前，Inez跟隊員到當地超市買乾糧，還遇上中國人，有他鄉遇故知感覺。
文：音樂組