泳兒拒認「二奶」命：做音樂唔係要紅！
新一代「發燒碟歌姬」泳兒在樂壇展開人生新里程，默默耕耘的她被形容一直在樂壇「二奶」的位置，坦承有過迷惘期，對歌唱事業感到灰心，但明白娛樂圈沒有定律，只要堅持用心，對得住自己便可。
眨眼已經入行11年，泳兒笑言時間飛逝，期間有很多意想不到的事發生，例如推出發燒碟：「如果初出道叫我出Hi-Fi碟，未必係適當時候。」雖然唱功了得，但她被形容一直在樂壇總是處於「二奶」位置，她對此笑說：「我又唔會用『二奶』去形容呢個狀況，唔可以話音樂條路好唔順暢，雖然中間有過好迷惘嘅時候，但比上不足比下有餘。」
泳兒認為樂壇裏面有好多不同成就的歌手，但外界會以知名度高低將歌手分等級，她坦言不會想自己在哪個Grade：「娛樂圈永遠冇一個定律，今年紅咗一隻歌，第二年可以突然唔見咗！你好想隻歌爆咩，佢就永遠都唔會爆！做音樂唔係為咗要紅，我慶幸做緊一份鍾意嘅職業。」她亦坦言迷惘時都諗過是否繼續唱下去，但覺得用心做好每一件事，對得住自己及幫助你的人已足夠：「好多嘢你冇得要求。」
出發燒碟感矛盾
提到剛推出第四張個人Hi-Fi發燒專輯《Fever》，今次大碟在日本錄音及製作，泳兒坦言：「我諗呢張係最靚聲。」既要平衡發燒碟及流行曲巿場，泳兒坦言有時感到矛盾：「聽發燒碟同追星嘅消費者係唔一樣，係難兼顧，一定要去平衡。」碟內收錄10首經典電影的歌曲，她自爆最初不想翻唱《天若有情》：「聽完原唱版本，我唔係點諗到可以去重新編過！不過冇諗過去咗日本編曲後，首歌居然變得咁唔同，掉番轉我覺得呢首歌係成隻碟最驚喜。」
文：音樂組
攝：鄭家俊
化妝：Cyrus Lee
髮型：Ziv Yeung（pi4.hk）
服飾：agnes b.／TELA
場地：Mini Hotel Causeway Bay