麥明詩對牛彈琴落錯注！
知唔知咩叫「久賭神仙輸」？睇吓曾經被喻為「人生勝利組」嘅麥明詩，近排點樣頭頭碰着黑就知！佢做《2017年度勁歌金曲頒獎典禮》主持，被網友喪插心不在焉，唔識畀反應，上氣唔接下氣又多懶音，喺台慶劇《誇世代》又被人彈戲屎，就連喺社交網站講番當年被性侵經歷，都被人話佢係借機抽水博宣傳，幾乎連呼吸都錯！堂堂一個劍橋法律系畢業生，呃唔到Like都算，仲呃埋呃埋咁多嬲嬲，搞到一沉百踩，因乜解究呀？怪只怪麥明詩只有聰明，但缺乏智慧！
有聲冇氣 照本宣科
Nuts哥都有睇番麥明詩《勁歌》當晚嘅片段，佢確實係講嘢唔夠氣，但佢展露嘅一手琴技，無可否認係幾OK！唔使福爾摩斯托世，都可以推斷到佢明顯係平時運動量不足，但一個讀書叻兼夾仲識彈琴嘅女狀元，究竟仲可以有幾多時間跑步、游水、行山？Nuts哥反而有另一個發現，就係當你唔睇畫面，只係聽聲，仲以為講緊嘢嗰個係袁詠儀，《新不了情》飾演病君嗰個袁詠儀！點解麥明詩主持《勁歌》會醜態百出？因為照本宣科跟稿讀嘅主持工作，根本唔啱佢做，你睇佢喺《#後生仔傾吓偈》，有個大方向畀咗佢，由佢自由發揮，佢幾多爆嘢講到出嚟，又話夜蒲鍾意着「嘟嘟裙」，又大談「分手炮」，有次講到女人40歲只可以啞忍老公喺出面滾嗰種無奈，佢仲梨花帶雨喊咗出嚟，不知令幾多後生仔攞起手上紙巾，隔住個Mon替明詩拭淚！
諸葛關公 撈亂嚟做
表面睇，呢種叫諸葛亮出去千里走單騎，叫關雲長返嚟巧布八陣圖嘅人手錯配，好似唔關麥明詩事，「香港地好多老細都係咁o架啦！」做藝人，除非紅透半邊天，否則就預咗派到嚟就要做！但唔好忘記，麥明詩嘅本行係法律專業，喺香港，由藝人轉去讀Law做律師而成功嘅例子有唔少，好似黃錦燊、盧敏儀等，但由律師走去做藝人，Nuts哥只記得十幾年前有位青靚白淨嘅男歌手，但出道半年，佢都選擇重投法律界，箇中原因好簡單，因為藝人嘅職責係娛樂觀眾，但律師嘅職責係娛樂當事人、陪審團定法官呀？做藝人又是否必須考取相關專業資格？喺外國可能有法律界轉做藝人嘅成功例子，但喺香港，一旦嘴張開即散發出攻鼻、刺耳MK味嘅馮盈盈，絕對比麥明詩更易呃到Like！
指羊為狗 水都難抽
你麥明詩「唔止一次」被性侵，兼夾有埋警方信件，力證唔係老作？咁又點呀？想分享啲法律意見，希望幫到被性侵嘅女士將色狼繩之於法？「好心啦，水唔係咁抽o架！」喺一個是非不分，指羊為狗嘅社會，麥明詩對牛彈琴，攞苦嚟辛！
做過律師嘅美國前國務卿希拉妮講過：「如果你活得久了，會發現生命中很多事情無法掌握，但你可以選擇如何面對。」試問喺動物園猛獸區落車行，被老虎監生咬死，可以怪老虎咩？麥明詩讀書係叻，但佢根本不懂技安（又名胖虎）！
Nuts哥