荷里活猛男謝勒畢拿日前亮相清談節目，他除了重提與真人騷女星Brandi Glanville的緋聞外，更自爆試過在火山及冰川「搞嘢」！
謝勒畢拿（Gerard Butler）大前晚亮相名嘴Andy Cohen節目《Watch What Happens Live》，期間被Fans來電問試過在哪些瘋狂的地方「搞嘢」？他答道：「試過有次喺火山旁邊搞，嗰次真係幾型，但其實幾熱。亦試過喺冰川搞過，好老實，真係唔過癮，個屁股黐咗喺啲冰上面。」
謝勒被問到早前與視星Brandi的緋聞，他直言曾與女方約會，但之後無聯絡。Brandi去年大讚謝勒的床上技巧滿分，謝勒亦提及此事，笑言當時不知她是視星，直至事後被提問，他更竟然回應不認識女方，令Brandi難過，直情「o趙完鬆」！另一位嘉賓50 Cent笑說：「如果你唔知佢個姓氏，就當冇發生過。」謝勒即大笑說：「如果係咁，咁我係處男！」而Brandi不甘被取笑，即時在twitter「反擊」：「謝勒畢拿唔知我姓乜或我做過乜係真嘅，但佢冧我同約我去街。」
另外，謝勒曾先後與影星畢彼特（Brad Pitt）的前妻珍妮花安妮絲頓（Jennifer Aniston）及安祖蓮娜祖莉（Angelina Jolie）在銀幕上咀嘴，被問到邊個好咀啲？謝勒尷尬掩面，50 Cent插嘴說：「唔係呀，我哋需要知！」謝勒回答是前者。
文：外娛組