趙頌茹屯門試鏡踏上成Mo之路
模特兒出身的趙頌茹（阿Yu）原來自小已訓練有素，經常充當媽咪的小Model。阿Yu指媽咪閒時會為她準備幾套靚衫，然後帶她到屋企附近的屯門公園拍照，此舉令她自小已習慣面對鏡頭，奠下日後的「成Mo」之路！阿Yu這天舊地重遊，童年點滴歷歷在目，或許是童心未變，變了的只有身高。
大個女，人工湖縮咗水？
甫踏進屯門公園，阿Yu就表現雀躍，並興奮地說：「我自細喺屯門大，呢度就係我細個嘅遊樂場，細個就嚟呢度玩。嗰時夏天冇依家咁熱，屋企人食完晚飯就落嚟行吓， 一係踩單車，一係散步，仲會買雪糕食。」最令她難忘的，是兩父女在園內的人工湖泛舟，她說：「頭先行過見到個湖，細個覺得好大，依家見到只係一個池塘咁細個，明明細個踩架船踩極都未踩得完，可能大個咗，發現冇我記憶之中咁大。」她又在湖畔重現5歲時挨着欄杆拍照的甫士，笑說：「我細個喺呢個位咁樣影過相，哈哈！」
準備戰衣影沙龍
其實公園每個角落都遍布阿Yu的足迹，因為她經常在此拍攝「寫真集」，她笑說：「我有好多相都喺呢個公園影，阿媽好鍾意等我同妹妹做完功課，佢又未煮飯呢段時間，就叫我哋拎幾套衫，帶我哋落嚟影相。我記得要不停換衫，影完啲相阿媽自己睇，所以一行過公園，我就記得細細個做媽咪嘅Model仔，好開心，好好笑，好好玩！睇番啲相雖然已經黃晒，但我仲記得成長過程。」
問到是否受媽咪影響，所以長大後成為模特兒？她說：「最大影響係習慣對鏡頭，以前爸爸媽媽都用嗰啲要換鏡頭嘅機，唔係依家數碼化，係要入菲林嘅大機！我依家買相機都係影個女，終於明白父母最好嘅Model就係小朋友，父母嘅興趣變相都成為我嘅興趣。」
咦？山坡仔去咗邊？
阿Yu之後去到人工瀑布前拍照，她表示小時候此處有位置可以玩水，每次玩到全身濕透就回家換衫，又憶起當年的小山坡：「依家呢度冇咗山坡仔，我以前仲同啲表姐妹一齊喺度食嘢，依家已經唔同晒，但就熱鬧好多，多咗人嚟唱歌囉，又有人跳舞！」
現年35歲的阿Yu自覺有三分一時間都在這個公園度過，現時亦會帶兩個女兒重遊舊地：「中秋節嘅時候同佢哋嚟玩，我哋細個可以玩蠟燭同埋紙燈籠，如果蠟燭插得唔好就燒着咗啦，不過依家係玩電子燈籠。我又會同個女講，阿媽以前喺度玩水、野餐嘅。」阿Yu憶起小時候還會在水池旁放紙船，不過現時公園已禁止這項活動，一切已成回憶。
後記：大細路冇時停
Yu向來予人冷酷感覺，實則童心未泯，更有調皮可愛的一面。她回到這個充滿童年回憶的地方，頓時變得開朗，滔滔不絕地講述童年回憶，期間手舞足蹈，臉上掛起純真笑容，內心的喜悅表露無遺！
文：專案組
攝：劉斌