TVB第一代小生陳振華逝世 遺體當無言老師

70年代著名電視演員陳振華日前於九龍聖德肋撒醫院離世，享年78歲。據悉，晚年的他視力及聽力衰退，連熱忱的掌相命理亦被迫放棄，專心養病，未料他身體情況每況愈下，最終不敵病魔！前年車淑梅於社交網上載與陳振華合照，當時他雖然滿頭白髮，但精神狀態尚算不錯，2016年她曾訪問陳振華，不過昨日她表示並不知對方的死訊：「我打咗多次電話畀華哥同陳太，但冇人接聽，早前知道華哥身體唔舒服，佢隻眼唔係幾好，我搵過醫生幫佢睇，過咗陣佢又話好啲，我以為佢會康復過嚟，因為陳太對華哥非常耐心照顧。」由於久未有再與華哥聯絡，所以聽到對方的死訊，大感愕然。
陳振華與李司棋合演的《啼笑因緣》，堪稱是代表作。
陳振華與李司棋合演的《啼笑因緣》，堪稱是代表作。

李司棋感愕然

生於1940年的陳振華被譽為無綫第一代首席小生，曾參演電視劇《啼笑因緣》及《民間傳奇》等，80年代初他離開電視圈，專心研究掌相命理，兩子陳廷軒及陳樂文則從事配音工作，陳振華晚年亦有開班教授配音技巧。由於陳振華作風低調，家人已根據其遺願，將遺體送往香港大學做無言老師。

李司棋當年與陳振華合拍《啼笑因緣》，昨晚她受訪時對舊拍檔離世大感愕然：「我一直冇佢嘅聯絡電話，不過十幾年前喺街見到佢，當時有人扶佢，可能嗰排有啲唔舒服啫，如果消息係真我覺得好可惜。（對佢有咩印象？）佢係謙謙君子，待人有禮，性格忍讓，間中同佢開玩笑，佢冇乜所謂。」至於丁羽對好友離世，回覆記者時說：「佢病咗好耐，上個月走咗，遺體捐咗去香港大學做研究。」

陳振華（左起）與兒子、李司棋、薛家燕早年出席電台活動。
  • 陳振華（左起）與兒子、李司棋、薛家燕早年出席電台活動。
車淑梅曾上載與陳振華的合照。
  • 車淑梅曾上載與陳振華的合照。