陳庭欣一揪二硬食拳腳
陳庭欣早前與李天縱及何佩珉為新劇對打，期間互相硬食對方拳腳。天縱表示日前與劉穎鏇對打時，不慎被對方打瘀鼻樑，她直言當時痛到流眼淚及流鼻血。
藝人陳庭欣日前與李天縱、何君誠、阮兒及白雲為無綫新劇《兄弟》拍對打戲，當中庭欣與天縱及做天縱替身的何佩珉埋身肉搏，硬食對方拳腳。面對眾女打交，飾演庭欣拍檔的君誠竟翹埋雙手睇好戲。幾位「有料」女星為了打鬥戲均紛紛封胸，改以皮褸打女造型上陣，略嫌有點遜色。
何君誠「食花生」
對於君誠站着看眾女打交，庭欣不禁投訴：「佢不知幾爽，好似拍MV咁。（頭先同天縱、佩珉對打互食拳腳？）食到飽晒！都有墊Pad，打落嚟有少少感覺，未至於痛。（打戲有冇受傷？）少少瘀傷，嚟緊有好多大場面，會去菲律賓拍槍戰戲。之前見到劉穎鏇拍打擂台戲打到瘦晒，臉都尖埋，楊明同王浩信就為咗騷肌唔食嘢。」又透露為該劇損失不少賺外快機會，完成劇集會放假到北海道旅行。
天縱被打瘀鼻樑
天縱則透露日前與劉穎鏇拍對打戲時，不慎被對方打瘀鼻樑：「當時痛到流眼淚，仲流埋鼻血。」白雲亦表示試過錯手打到王浩信背脊：「唔知佢當時痛唔痛，我有打開泰拳，嗰下佢背住我，我估佢OK啩！」
文：影視組