君如小學雞導演搶逾2億人仔
由影星吳君如自導自演，加上吳鎮宇及方中信主演的新片《妖鈴鈴》最近上映，昨日君如到旺角某戲院進行謝票，她穿上戲中的道袍及黑超，又手執捉妖劍登場，觀眾見到君如即非常開心，君如抽出三位幸運兒送上福袋，又與觀眾大合照，氣氛熱鬧！
囡囡轉數快
君如表示過去連續兩星期游走內地十幾個城市，走勻百幾間戲院，昨日是香港最後一站，因舟車勞頓，她直言略感不適：「要開始休息，少少唔舒服，呢排都唔知自己瞓邊。（你咁忙，阿女有冇詐型？）我同佢講今日係今年最後一日做嘢，佢反白眼，話今日咪今年最後一日囉！佢轉數好快，佢阿媽就愈來愈慢。」
她直言新片內地票房理想，已收逾二億元人民幣，但香港票房則普通，不過她認為屬正常：「院線少咗啲，對手好多大片，盡做啦！（下次唔放大檔期？）本身想鬼節上，但趕唔切，可能大家慣咗聖誕睇西片，農曆年睇港片，呢啲計埋緣分彩數。（有冇失望？）冇，好開心，大陸票房好，我呢個小學雞導演都OK合格，係嘗試。（諗定拍第二套？）休息吓先，靈感到會顯靈，咁都要睇市場受唔受。」
文：影視組