馮盈盈檢討：講嘢太MK
前晚《2017年度勁歌金曲頒獎典禮》圓滿落幕，不過身為司儀的麥明詩（Louisa）和馮盈盈的表現遭不少網民狂批，包括馮盈盈頻頻食螺絲，更被批評衣着不當，有欠莊重。而Louisa則同樣被批咬字不清、聲音難聽以及樣子經常「天然呆」，再加上她們跟陸浩明（6號）突然大跳「抖肩舞」狂Rap，更邀請場內歌手參與，網民紛紛留言指場面尷尬難看，有人更說：「差啲電視機都想掉爛」、「令人笑到有腹肌」！
昨日Louisa接受本報電話訪問時解釋：「第一次主持Live嘅節目就咩都唔識，例如啲時間控制、點樣應對臨時嘅改動，而今次喺6號身上吸收咗一啲經驗同埋貼士，之後都會睇多啲嘟姐（鄭裕玲）主持嘅節目，喺佢身上偷吓師，希望下次會做得好啲，同埋快啲箍完牙。」
因超時食螺絲
而馮盈盈昨受訪時則逐點解釋，她指大家應將焦點放在得獎歌手身上，又指網民反應不只是一面倒的負評，但承認還有不少改善空間：「就係講嘢太『MK』，唔夠莊重，其實我哋嘅主題係『Music is Everywhere』，想講貼地生活化，所以我哋嘅表達方式都貼地啲。」至於被批評食螺絲，她說：「因為個節目開始冇耐就超時，但咁多嘢要頒，如果你有睇足成個騷，我哋三個主持係冇催過歌手講快啲或Cut佢哋啲歌同得獎感言，犧牲個位就係我哋講嘢嘅時間。」她認為第一次做大騷主持已盡力做好，希望繼續學習，會有所進步。
文：專案組