張寶兒 劉穎鏇 馮盈盈 愈嘈愈爆笑
前香港小姐馮盈盈、劉穎鏇及張寶兒未卸任時已加入無綫節目《學是學非》，她們花了一段時間卸下港姐形象，由儀態萬千進化成嘈嘈閉的「是非精」，發揮搞笑潛能，以真性情吸引觀眾。
馮：馮盈盈 劉：劉穎鏇（Tiffany） 張：張寶兒
外表斯文 大聲過人
馮：最初拍《學是學非》邊個最勁港姐味呢？
張：自己初頭潛意識都仲係好港姐o架，行出嚟好似聽到港姐音樂咁，哈哈哈。
劉：開頭做《學是學非》時一唔知點擺甫士，就會自然擺港姐甫士，企到好直、叉住腰，導演就會話「依家係是非精，唔要港姐。」依家間中都仲未戒到港姐，不過最勁港姐味應該係盈盈。
馮：係我咩？哈哈哈。
張：鏡頭前嘅港姐斯斯文文，但私下就唔係咁，我哋成班女仔其實都好嘈。
劉：做咗「是非精」之後我哋升咗呢，我哋三個走埋一齊冇一個Moment係會冇聲，就算停咗機我哋都繼續喺度玩，導演都頂我哋唔順。
張：Tiffany初時比較靜，後來佢覺得自己遮蓋唔到我哋把聲，講嘢就愈嚟愈大聲。
馮：於是我哋兩個又再大聲啲，搞到愈嚟愈嘈。
劉：自己喺外國返嚟，初頭覺得好似外人咁，慢慢熟落咗就打開咗我嘅真本性，講嘢大膽咗，但係成日都講錯嘢，啲音講到錯晒，佢哋話我所講嘅同所表達嘅係完全兩回事，我話係咩？哈哈哈。
張：大家心態上都有好大轉變，以前介意外間睇法，依家就唔介意，來吧！哈哈！本身性格都係傻傻哋，做番自己更加隨心所欲，講嘢大膽啲，扮樣衰、表情又大膽啲。
馮：心態上要放低港姐形象，未卸任都仲有少少港姐形象要顧及，卸任咗就冇顧慮。啲師姐都話終於有接班人，估唔到我哋嘅破壞力可以勁過麥美恩，張寶兒就竟然可以蠢過湯洛雯。
馮盈盈
滿腦子爛Gag的馮盈盈為朋友帶來歡樂，未了解她的人，可能會覺得她有點做作，但實情她是……
張：最初覺得盈盈有啲做作，哈哈哈，識耐咗原來佢真係一個傻大姐，仲要係高音嘅傻大姐！
劉：初時見佢講嘢好似怪怪哋，習慣咗覺得呢啲真係盈盈嘅語氣嚟，同佢相處一日就會明白。
馮：呢個係我嘅Style呀！
張：真係盈盈Style。
劉：仲好周星馳添！
馮：自己講嘢係有啲奇怪，自己都知，哈哈哈。
張：佢好多爛Gag，好有娛樂性。
劉：盈盈係一個好特別嘅人，好多奇想。有次塞車，佢話點解隔籬線冇人，然後就駛咗去隔籬線，然後就聽到佢大叫有對頭車呀！
馮：自己真係好多無厘頭嘅蝦碌嘢，可能由細到大睇得太多周星馳，依家想搣都搣唔甩。都有個困擾，好似做咩都變成喜劇咁，有次訓練班做悲劇角色，喊埋出嚟，以為可以感動大家，點知大家笑到哈哈哈。
劉：監製都話唔明點解，盈盈可以將場咁悲痛嘅戲演繹到變咗喜劇。
馮：我都鍾意做喜劇角色，一行出去大家已經哈哈哈咁笑，睇嚟我無望做悲劇角色。
張寶兒
張寶兒被「是非精」師姐欽點接湯洛雯棒，因再難找到比湯洛雯更蠢、更呆的人。而在馮盈盈與劉穎鏇眼中的她卻是易喊易笑，感情豐富，做演員最適合不過。
馮：初頭見張寶兒覺得佢好有古典味，好書卷氣質。
劉：佢初頭好靜，好似隨時可以攞本書出嚟讀嗰種，佢拍《學是學非》日日帶飯盒，麥美恩都問：「連外景你都有時間帶飯盒？」
馮：但佢食完自己個飯盒都唔夠飽，要再食多個飯盒。
劉：張寶兒係好鍾意笑、好鍾意喊，情感好豐富嘅人，以前一齊上訓練班，佢可以話喊就喊到豬頭咁，想像力好豐富。
劉穎鏇
5呎9吋高的劉穎鏇與嬌滴滴的馮盈盈、張寶兒相比更顯高大威猛，難怪訓練班時經常要反串，還被取笑睇好奪「飛躍男演員」，令她哭笑不得。
張：Tiffany唔笑個樣好Cool。
劉：係呀，我一唔笑就係咁，真係要檢討吓，咩時間都要保持微笑。
張：喺訓練班嗰陣，Tiffnay演技好犀利，嗌交就最精彩。
馮：佢扮男仔好似，我哋嗰班少男仔，所以佢咁高大就成日畀老師搵佢扮男仔，有次佢直情做晒男女兩邊，監製讚扮男仔仲好啲，大家都拭目以待睇佢可唔可以攞到「飛躍進步男藝員」啦，哈哈。
採：影視組
攝：司徒國榮