張振朗剝剩孖煙囪等救兵

龔嘉欣和張振朗昨日到大埔科學園為無綫新劇《堅離地愛堅離地》開工，拍攝張振朗被畫大花臉後齋着孖煙囪瑟縮一角，待龔嘉欣打救的場面。拍攝前，龔嘉欣親自操刀，用唇膏及簽名筆幫張振朗畫花臉，每畫一筆就忍不住笑一下，愈畫愈High的她更畫到對方半邊面紅卜卜，似足鍾無艷！

聖誕開工劇接劇

龔嘉欣受訪時大爆新劇有不少尷尬場口：「有場係佢除褲笠住我個頭，咁大個女都未試過咁，感覺好怪！（條褲暖？有味？）仲暖，好新鮮！但聞唔到有味，咁啱嗰幾日感冒。」提到聖誕將至，她表示要在工作中度過，因為平安夜拍攝《堅》劇煞科戲後，翌日便緊接為另一套新劇《包青天》開工。

除剩孖煙囪的張振朗終於等到龔嘉欣打救。	龔嘉欣自爆早前被張振朗除褲笠頭，場面尷尬。	張振朗瑟縮一角，狀甚可憐！

整蠱朋友自作孽

張振朗則笑指自己因多次在戲中露肉，已變性感男星：「公司個『限奶令』應該要限啲男仔！」又笑言今次被畫花臉是以前作孽的報應，因之前曾整蠱醉酒朋友：「我唔止畫佢塊面，仲畫埋佢個身，寫住龍的傳人，又喺佢乳頭附近畫咗朵小菊花，到佢返公司換衫時先發現，佢即嗌Oh My God兼擰轉身！」

文：影視組