陳志雲爆無綫高層角力吵大鑊

前無綫高層陳志雲最近分別為亞視和網台主持《百萬富翁2018》及新節目《大開眼界》，過足主持癮。當年在無綫位高權重的他，亦是台慶頒獎禮之父，皆因當初由他提出舉辦，當中所牽涉的鬥爭和秘聞，非常受大眾關注。

絕冇簽約換獎

志雲稱：「我記得係我提出做頒獎禮，當時做緊節目部總監，最後落實製作部去做。」台慶頒獎禮出現，令編排劇集檔期及獎項成為「必爭之地」，他笑說：「節目部就做咗磨心，大家角力。記得最犀利係排《天與地》喺十二月，因為唔係台慶劇，製作部唔係咁高興！製作最大吸引力就係冇一定得嘅方程式，好似《金枝慾孽》估唔到得成咁。」

劇集爭檔期爭崩頭，視帝及視后情況更激烈！志雲坦言主政的年代沒有傳聞中簽約換獎：「當時制度係觀眾投票佔一定比數，內部評審係佔好重要嘅元素，係會影響結果，當時內部係好公開、透明咁討論，內部自己角力係會爭崩頭o架！會講到反面、面紅耳赤，呢啲真係有嘅，講唔掂咪搵高層去定奪。」他又指當時沒有藝員向他埋堆爭獎，但相信會有人向監製爭取。

談到今年視帝以王浩信及馬國明呼聲最高，志雲表示：「冇睇好邊個，兩套劇都冇睇，王浩信唔係好認識，我認識馬國明，當然希望佢攞，但唔代表王浩信唔好。馬國明係非常好嘅人，好謙虛、冇野心，係一個天真爛漫嘅鄰家男孩。」

餐廳「溝仔」被趕

另外，陳志雲自爆當年為了物色小生，要到餐廳「溝仔」：「以前搵小生好難，方姐（方逸華）叫我哋出去見多啲人推介畀公司，而方姐亦有講起一間餐廳，話個服務員好型，問我可唔可以吸引到佢入行，結果我咪畀間餐廳趕咗出去，話『我哋唔歡迎你嚟，你做乜撬我啲人』，令我好耐都唔敢再去。」

文：影視組

攝：吳文聰

場地：皇子酒店

髮型：i HAIR@Base Luk