JW地獄式谷肌死頂戒口
出名靚聲的王灝兒（JW）將於明年1月，初嘗紅館開騷的滋味，為以最佳狀態完成夢想，在男友督促下勒令戒口兼積極操Fit，望練到腹肌來應付演唱會。一向為食的JW直言戒口最難頂，但為了處女騷無論幾辛苦都值。
入行7年的JW終於在明年1月登上紅館，舉行首個處女演唱會。最近JW密密做運動Keep Fit，更找來健身教練進行地獄式訓練。她透露一有空就會去做Gym和排舞，身形亦比以前清減不少：「好開心瘦咗！雖然係辛苦，但係值得嘅，始終都係第一次紅館演唱會，一個咁難得嘅機會。」問可有因地獄式訓練而頂唔順？她稱幸好教練是逐步加強訓練，又揚言想練到有腹肌，但同時間要在飲食方面多下苦功：「距離演唱會仲有唔係好耐，已經開始Cut Down晒所有油膩、高熱量同埋澱粉質，仲要戒甜品、鹹嘅嘢，要食得好清淡。」問向來為食的她可有忍不住偷食？她大呻戒口最辛苦，不過有男友在身邊督促自己：「夜少少肚餓想食嘢，佢就會話我！」
緊張壓力大
談到演唱會方面，JW透露今次會加入很多特別視覺效果配合歌曲及主題，希望大家能夠享受到充滿娛樂性的演唱會。提到過往曾有塌台事故發生，她表示今次演唱會都會有機關，但自己非常信任導演及團隊。問首次踏上紅館舞台壓力是否很大？JW笑言：「都好大壓力o架，我自己係比較緊張嘅人，第一次喺紅館完全唔知道會發生咩事，或者唔知大家會有咩反應，不過覺得最開心係全公司上上下下都支持我，只要做好自己本分就夠。」
此外，JW坦言很感恩有舊公司的栽培才做到歌手，現在轉新公司後有機會開紅館騷，她當然想邀請舊老闆黎明來欣賞。
文：音樂組
攝：劉斌