林師傑儲錢結婚歐陽巧瑩(舌累)飯應

無綫藝員林師傑、歐陽巧瑩、莊思明、楊詩敏、翟威廉、羅天宇、港姐黃瑋琦及張寶欣昨日在中環出席明珠台《暖暖聖誕．愛樂無限》大派對，期間為昨日生日的張寶欣慶祝。林師傑與女友歐陽巧瑩被問到如何慶祝聖誕？他說：「我哋有個共識節日唔會大事慶祝，慳啲錢，儲錢買樓、結婚，會喺屋企煎塊牛扒睇戲。（幾時結？）愈快愈好，搵到啱嘅人好難得。」歐陽巧瑩聽完即一臉冧爆，當被問可願意時？她即說：「我願呀！但要等啱時間。（要浪漫求婚？）千祈唔好，會好驚、好尷尬。」林師傑又指因未清楚明年工作安排，暫時未有結婚時間表，家人亦沒有催婚，反而老闆何哲圖有：「佢問過我幾時結婚，我就話做嘢先，點知佢好嬲咁鬧我，叫我唔好嘥人時間，分手啦！老闆好想我結婚。」