王馨平跌落海險死
歌手王馨平在馬爾代夫發生墮海意外，整個人直插黑麻麻的海中，幸臨危不亂自救游上水面，但傷及腳及撼親頭，要坐輪椅代步。
王馨平（Linda）下嫁富貴老公後過着少奶奶生活，日前夫婦到馬爾代夫度假，不料臨返港卻遇意外。她在社交網上載坐輪椅的照片，留言：「只需一秒的時間，意外就會發生。」相中隱約可見其左腳的紗布有血漬。
昨日返抵香港的Linda接受電話訪問，自嘲受傷全因「Too Stupid」，並詳述意外經過。她表示準備離開馬爾代夫度假小島往機場時，上遊艇時疑差錯腳跌入海中：「嗰時天黑，又落大雨，有人扶住我嘅，但唔知點解右腳踏咗上船，左腳差錯腳，嗰下就跌咗落去，啲人拉都拉唔住。我係成個人撻咗落去沉咗落海底，我只係記得：『吓，點解我喺水裏面嘅？哈……』呢啲咪意外，我覺得好好笑。」
問當時可有人救援？Linda自言識游水，故自行游上水面，但期間頭頂曾撼到船底：「啲人話撼親頭可大可小，但我真係冇事，個頭冇傷到。（可會Claim保險？）暫時未同老公商量。」離開水面後，因她左腳有傷，酒店職員即為她搽藥及貼膠布，由於全身濕透，她要折返酒店沖涼更衣再往機場。至於為何要坐輪椅，她笑說：「係航空公司大陣仗啫！咁有得坐咪坐吓囉！」
唔去醫院去教瑜伽
問Linda返港後可有即到醫院檢查？她竟說：「班機遲咗起飛，我返到港就趕住去教瑜伽班，因為唔想失場，老公都有叫我快啲去醫院。」從她提供的腳傷照片中，見其腳上紗布滲滿血，她覺得是小事：「我行得、走得，頭先郁動過先滲血啫！」其後Linda再接受訪問，透露已經就醫，醫生要她打破傷風針，她即呻要再受皮肉之痛。
文：音樂組