衛詩雅讚嘉玲有氣勢Sweet Mom
女星衛詩雅於新片飾演影后劉嘉玲的女兒，她直言起初有被嘉玲的氣勢嚇親，但接觸後讚對方完全是一位慈祥媽媽，令她感到很甜。同場的孫慧雪則笑指4個月大的囝囝重達20磅，自嘲奶量供不應求。
任達華、衛詩雅、謝賢、王菀之及孫慧雪等前晚出席英皇電影《我的情敵女婿》煞科宴，老闆楊受成專程來開香檳慶祝，場面熱鬧！片中飾演劉嘉玲囡囡的衛詩雅，透露從小到大都喜歡對方，一直希望有機會合作，今次終於如願感高興。
對於這位影后，衛詩雅大讚對方是大美人，更說：「好榮幸，其實初初開工有啲驚，因為佢實在太有氣勢，但接觸過後覺得佢係好細心嘅前輩，好有媽媽Feel，會拖住手叫阿女咁，好Sweet，唔會驚。（有冇指導你演戲？）又冇乜傾，大家好Free，講對白好自然流露。」
視線離唔開王菀之
談到今次與王菀之演姊妹，對方演僅得4歲智商的角色，衛詩雅說：「佢最拿手啦！喺片場帶歡樂畀大家，大家仲笑佢已經比平時智商高兩歲。其實大家已經第四次合作，但每次喺片場我視線都離開唔到佢，因為佢喜感好勁，但我就反應慢，所以趁機偷師。」
孫慧雪爆囝囝大食
而榮升母親的孫慧雪透露，該片乃坐月後復工的作品，沒料客串一場戲卻搞到出風疹，笑言算為藝術犧牲。談到產後4個月仍未收身，她指現時重130磅，比生仔前重了廿多磅：「餵人奶所以未減，半年後會減，目標係回復生之前嘅磅數。」她指20磅重的囝囝食量大，自嘲奶量供不應求，故會加入奶粉及固體食物給囝囝。談到好友賴慰玲最近生B，孫慧雪大讚BB靚仔，輪廓分明兼雙眼皮深。
同場的任達華表示將舉家到芬蘭度聖誕，由於太太琦琦喜歡雪鹿，他笑言已準備戴假肚同行，準備扮聖誕老人給太太驚喜。
文：影視組