現年40歲的Coldplay主音Chris Martin一向對圈中人情有獨鍾，繼與英國女星Annabelle Wallis傳緋聞後，最近被指撻着比他年輕12載的賣座情慾片《格雷的五十道色戒》（Fifty Shades of Grey）美國女星狄高達莊遜（Dakota Johnson）！
最近有傳二人同到以色列度假，被撞見在Herzliya食晚飯撐枱腳，同行還有著名男歌手Nick Cave，而二人有一同睇Nick開騷。知情者說：「佢哋好親密一齊坐，但冇錫、冇拖手。」另有消息指：「佢哋已經對對方好了解，相處得好舒服，Chris會畀啲作品狄高達聽，叫佢畀意見，並非玩玩吓。」上月狄高達曾被影睇Coldplay阿根廷的演唱會。