周慧敏心郁郁演慳妹2.0
歌手周慧敏在無綫經典劇集《大時代》的慳妹角色深入民心，雖然她沒想過把「慳妹」搬上明年1月底的紅館騷舞台，但深感角色對自己影響極大，即使看重播都晚晚有心跳感覺，坦言可以考慮重演慳妹！
周慧敏（Vivian）將於明年1月26至29日在紅館舉行《一萬天荒愛未老．周慧敏30週年演唱會》，她表示想與大家重溫經典：「我可能同唔只一代人成長，有啲朋友依家先識我，有啲可能喺我做DJ時已經識。」提到「慳妹」是觀眾心目中印象極深的角色，Vivian沒想過把角色搬上紅館，但說：「呢個角色一路都喺我心裏面有好重要嘅位置，唯獨佢永遠磨滅唔到，好熟悉，但又好陌生。」她透露看了該劇兩次，第一次是當年收工後回家看錄影帶：「跟住已經唔敢再睇，直至兩年前重播變成全城熱話，其實我有DVD，但冇睇，同大家喺電視播嘅時候逐集睇。」
「要睇吓應唔應付到」
Vivian直認慳妹影響自己很多，能夠在觀眾角度再看此劇，感覺如尋回之前的日記：「有番心跳嘅感覺，晚晚都有！（如果有類似慳妹嘅角色，你肯演？）我仲演唔演到慳妹呢？佢同我嘅年紀好唔同，要睇吓自己應唔應付到，又要睇劇本點寫，都可以諗吓。」不過她強調新角色一定不再是慳妹，不希望破壞經典，故比較想演繹新的角色：「我都接到一啲劇本，唔只電視、電影，仲有舞台劇，但都係想等到一個自己會心動，感動到我嘅，咁就有動力去做。」
文：音樂組
攝：劉斌
場地：紅磡都會海逸酒店