黃翠如不甘被踩向細妹偷師

藝人黃翠如與蕭正楠拍拖以來經常隔空耍花槍,阿蕭日前踢爆翠如自煎燶蛋後便不肯下廚,翠如昨日出席劇集宣傳時大反擊,笑罵男友破壞她形象,稍後會致電問責,並打算去細妹的食店偷師!

黃翠如、陳敏之、岑麗香、夏雨、李司棋等昨日齊齊出席無綫劇集《翠華餐廳五十周年呈獻:溏心風暴3》之「溏心侍應大激鬥」活動,席間宣布劇集播出以來,網上累積播放量達3.6億。一眾演員於台上呼籲觀眾切勿從非法網站觀看劇集,未有到場的黃宗澤也有拍片支持。

「廚具用熟啲比較好」

近日被男友蕭正楠批評廚藝差的翠如,被問到是否每晚收工也要對方下廚?翠如笑說:「我唔係日日見佢,我會保留追究權利!我煎爆過一次雞蛋啫,因為唔熟個鑊,廚具用熟啲比較好。」翠如更否認是「地獄廚神」,笑罵阿蕭為她建立如此形象:「佢死梗!一陣打電話嘈佢,佢對食要求高先緊張啲!」不過談到拿手小菜,翠如卻想了片刻才指炮製一頓飯絕無問題:「我細妹依家開咗間臨時餐廳賣煎魚,我會去學吓嘅。(會考慮上廚藝班?)我以前做過飲食節目,係阿蕭誹謗我囉!」

香香同老公冇秘密

而香香對於好友王君馨找老公填補空虛,認為最重要是找到信得過的人支持:「我會做運動、畫畫同整嘢食,成功做到就會好有滿足感,我同老公不嬲都有傾偈,有咩就講出嚟,佢唔會質疑我,令我好大安全感,我哋冇秘密,佢所有嘢我都知晒!」

至於夏雨直言該劇尚未播的集數已能在非法網站有得睇,非常離譜:「絕對會影響收視成績,呼籲大家要睇正版!(套劇有冇帶挈工作畀你?)冇喎!不過14號去深圳宣傳,到時要催谷吓啲工作。」談到甘草演員江漢日前離世,夏雨表示以往工作時會跟對方閒談,但私下比較少聯絡:「佢份人好好,冇架子,係當年紅透影壇嘅中流砥柱,後期身體狀況差啲,之後就聽到佢離世消息。」

文:影視組