外勞在競爭激烈的荷里活要成功絕對唔容易！來自以色列的索女Gal Gadot今年暑假憑DC超級英雄大片《神奇女俠》（Wonder Woman）成功上位，唔夠半年Gal在超英晒冷大作《正義聯盟》再演「神女」，不過原來她曾因工作壓力爆煲而諗過「執埋包袱」返鄉下！
現年32歲的Gal其實早於七年前已在荷里活演藝界打滾，只可惜當時星運麻麻，多年來僅得兩集《狂野時速》（Fast & Furious）令人留下印象。在事業低潮期，她一度想放棄一切返回家鄉「重新嚟過」，她說：「在我接拍《神奇女俠》以前，我曾認真考慮收拾一切返以色列，唔再返嚟洛杉磯。可能喺以色列做個演員仔或者讀大學、試吓做其他嘢！」
Gal亦解釋想退出荷里活的原因：「當你被一次又一次邀請試鏡，進行第二次面試嗰陣，聽住人哋同你講電影成功嘅話，生活就會從此改變，但『成功』從來都冇降臨在你身上........然後你就會覺得好氣餒，我亦知道當時嘅自己已經就快頂唔順！」除了成功遙不可及令她氣餒之外，同時亦因為其丈夫在以色列公務繁多，所以兩夫婦經常要分隔異地，這也對她構成很大壓力！正當Gal猶豫要否「執包袱」之際，就獲邀參演《神奇女俠》，亦正如選角導演所說：「電影成功嘅話，生活會從此改變。」現在的她不單止是「神奇女俠」，還是荷里活公認的女神！
提到今次在《正義聯盟》（Justice League）中再演「神奇女俠」，一眾Fans以為經過《神》的成功，令她在這部超英大片中佔重戲份，Gal就坦承雖然角色是電影的重心人物，但就絕非整體的焦點。她說：「我只係拍咗一個星期，戴安娜（神奇女俠）嘅任務就係連繫住整支隊伍。佢支持每個成員，並令佢哋感到更堅強或相信自己，但呢套絕對唔係《神奇女俠》嘅電影！」
人紅自然多人爭，Gal Gadot亦不例外，片約一部接一部！除有原先簽下的《神》與《正》續集外，亦有《Flashpoint》、《Ruin》與《Deeper》三部片約。
此外，最近有傳Gal將取代女星安祖蓮娜祖莉（Angelina Jolie）擔演舊片重拍的《Bride of Frankenstein》，該片於1935年曾被拍成同名電影《科學怪人的新婦》，並大受歡迎。據知安祖蓮娜因拍攝《黑魔后2》而無暇參演，加上她對該片亦興趣不大。失去首選後，據知導演Bill Condon即轉移希望在Gal身上，望搵她擔正！
文：外娛組