張繼聰揸車講道理禁妻兒做低頭族
藝人張繼聰前晚為「全新BMW X3發佈派對」擔任主禮嘉賓，他笑言小朋友出世後座駕愈來愈大：「以前買車要外形有型，依家要裏面舒適，證明我踏入人生另一個階段，而且因為家庭成員多，所以屋企有三部車。」又自言很享受揸車過程：「因為我住得遠所以車程耐，一個人揸車可以好好沉澱同反思吓。一家人嘅時候可以好好傾偈，我有個規矩，坐車唔畀玩電話。」
黃心美駕駛技術水皮
阿聰表示一有空檔會充當司機載老婆謝安琪（Kay）及送囝囝返學：「我會喺車上同囝囝講吓人生道理。」更為老婆平反，讚對方揸車技巧了得：「大家都知佢上次揩花咗條軨，但我要幫佢講句公道說話，佢換咗四條軨只係用咗一千幾百，我之前撞甩咗個輪拱整咗一大筆錢，相比起嚟佢個傷亡程度好小事。」此外，他透露聖誕節會留港：「因為我細女出世後過第一個聖誕節，想帶佢睇吓聖誕燈飾同食聖誕大餐感受吓氣氛。」
擔任大會司儀的黃心美則自認駕駛技術水皮，雖然16歲在溫哥華已考獲車牌，但試過撞燈柱，幸好沒有受傷，但座駕Total Loss，當時更要鼓起勇氣告訴爸爸：「係個頭開得唔好，有車牌但冇人肯借車畀我練。我有車位但冇車，等緊（胞妹）黃心穎搬出去，佢霸住我個車位。」
文：名人組