賴慰玲痛足36小時臨危改開刀分娩
現年31歲的賴慰玲與拍拖五年的舞台劇男友梁子峰今年奉子成婚，日前她剖腹誕下男嬰，可喜可賀！賴慰玲昨日在社交網站報喜，指BB重6.6磅，並由榮升契爺的鄭嘉穎操刀取名「Marat」，意思是想仔仔「好Man」，賴慰玲笑說：「要Man到心口有胸毛！」
家中坐月的賴慰玲昨日接受訪問，大談分娩過程，原來她本想順產，但因穿羊水太耐而要變陣改為開刀：「BB喺預產期出世，穿羊水入院嗰陣都未痛，之後陣痛開始愈嚟愈勁，痛到食唔到嘢，仲大叫原來生仔係咁痛！頂咗36個鐘，因為唔可以穿水太耐，最後決定開刀。」
賴慰玲一班好友陳嘉寶、田蕊妮與蔡思貝等輪住探BB，其中蔡思貝與吳嘉熙爭住幫手換尿片，賴慰玲說：「Sisley（蔡思貝）同Cherona（吳嘉熙）嚟到見到BB有便便，即刻好興奮爭住換片，但佢哋都雞手鴨腳，我同阿雪（孫慧雪）睇到一額汗！不過BB一出世就有好契爺、好契媽爭住錫佢，我都好開心！」她直言已患一般媽媽都會患的「我BB最可愛症」，望實BB可以目不轉睛。
