黛絲爆紅慌失失戒療自救

二十五歲英國女星黛絲烈尼(Daisy Ridley)前年擔正「星戰」回歸作即爆紅,雖然密密接大片坐火箭上位,但「升呢」後仍不改傻大姐作風,更率直自爆因成名而要接受戒療,怕紅得快、跌得快失去自我,極力做個「貼地」女星!

黛絲前年於《星球大戰:原力覺醒》(Star Wars:The Force Awakens,簡稱《星戰7》)孭重飛,一片爆紅即片約不斷,不但於續集《星球大戰:最後絕地武士》(Star Wars:The Last Jedi)擔大旗,更孖實力派紅星包括尊尼特普(Johnny Depp)與米雪菲花(Michelle Pfeiffer)等,出演由列尼史葛(Ridley Scott)監製的神級小說改編懸疑片《東方快車謀殺案》(Murder on the Orient Express),火速上位。她近期受訪時憶述當初於7個月內多次為《星戰7》試鏡,最後獲知有份拍的感覺「堅離地」:「呢個唔係一個角色,(星戰)係大眾嘅信仰。」

向媽咪哭訴

雖然演出大製作表現獲讚,但黛絲備受壓力,怕於續集中失威及對成名充滿恐懼:「啲人開始認得我,我唔知點面對,我嘅皮膚因為我壓力大而變得好差,我感覺好似好冇安全感,而且自我意識好強。」她提到有次有粉絲上其酒店房要求簽名時,她爆粗拒絕,而且每個月都喊住打畀媽咪傾訴:「我仲未準備好面對呢啲(名氣)。」最後毅然決定接受戒療:「我感覺自己因為太擔心人哋認得我,而失去緊自己。」

不過黛絲亦講明自己並非投訴,而且對事業發展心存感恩,只是怕價值觀被改變:「我怕自己會習慣咗啲星級待遇,好似被送到機場,唔需要排隊,而且會拎到平時根本唔會拎到嘅門票等,我提住自己所有事根本『唔普通』,係件好重要嘅事!」黛絲於訪問中亦自爆愈忙愈思鄉:「我突然發現由二月開始,我最長留於家中嘅時間僅得4日。」

苦練激光劍

雖然面對成名充滿壓力,但黛絲對工作仍然未有「揸流攤」,提到拍攝《星球大戰:最後絕地武士》,她大爆拍攝用的激光劍重約5kg,根本唔似小朋友揈來揈去咁過癮,她更為「格劍戲」而苦苦訓練,拎住重量分布不平均的激光劍日打夜打,每次上下打八下作訓練。記者笑指訓練可被宣傳為一種運動時,黛絲不但同意更追加新想法:「係激光劍學堂!」

「落閘」避談戀情

黛絲情史不算多,與同鄉視星Charlie Hamblett爆戀情幾年都少有回應,近日受訪時更直接「落閘」唔講戀情。不過日前就有傳她撻着《東》片男拍檔Tom Bateman,監製Judy Hofflund更親口爆料指二人「有料到」,但男方就笑稱監製僅為電影「炒作」。雖然黛絲好口密,但受訪時亦大方分享已故星戰拍檔嘉莉菲莎(Carrie Fisher)對她於事業與愛情的「溫馨提示」,表示做「星戰女」影響桃花:「(嘉莉表示)因為你唔會想畀機會人哋講:『我同莉亞公主上過床!』」未知黛絲是否因而將戀情低調處理?

文:外娛組