古天樂想拍劇：最緊要劇本好
古天樂是圈中出名的孝順仔，他表示想帶父母到芬蘭過白色聖誕，但父母一早有約，要看時間能否配合。他又恭喜老拍檔宣萱膺視后，坦言若有合適劇本都想拍劇。
型男古天樂昨晚出席「又一城‧快樂聖誕」開幕禮暨聖誕樹亮燈儀式活動，現場有不少女士踢腿跳舞，非常熱鬧。他在台上透露聖誕有假放，希望跟父母旅行過白色聖誕。古仔接受訪問時，對於宣萱剛於吉隆坡奪視后獎項，古仔坦言不知道：「我真係唔知，都戥佢開心，會諗吓送乜嘢禮物畀佢。（想唔想拍劇攞視帝？）有合適都想拍，但係視唔視帝唔係重點，最緊要劇本同拍檔好。好似宣萱咁，大家熟啲再合作會好啲。」
想過白色聖誕
古仔又稱原本打算帶父母去旅行，但原來二人已約了人，希望雙親可調動時間配合。問到是否很久沒過白色聖誕？他說：「唔係好耐，係未試過飄住雪嘅白色聖誕，難得有假期，都想帶父母去旅行，之前嘅眼傷又開始好轉，已經拆咗線，依家只係一個月覆診一次，半年冇問題就冇事。」
自認辛苦命
提到古仔最近拍電影又引致椎間盤凸出，他說：「好番喇！嗰三、四日要拍打戲，一邊進行針灸，一邊電療，可能拍動作戲血液循環好，快啲好番。（辛苦命？）係呀，唔做唔舒服。」問到想去甚麼地方旅行？他坦言想去芬蘭，但因機程太耐，擔心不夠時間。他又指日本太多遊客：「帶父母去，太多人費事麻煩啦！」
文：影視組