黃子華神級踎躉打牌妙悟人生
乜嘢係「同人唔同命」？睇吓「棟篤男神」黃子華就知！同好多喺年頭誓神劈願話今年要點點點嘅人一樣，子華今年都冇乜嘢做過，冇開棟篤笑，冇演話劇，冇戲冇劇上，更加冇出碟冇出歌，只係拍片呼籲關注弱勢社群，同喺幾個演唱會度亮吓相，但依然無損佢喺班米飯班主心目中嘅評價，有乜嘢人可以全年唔使do，只係睇show，佢老細都當佢神咁拜？Nuts哥只諗到黃子華！
冇上網一片空白？
你話：「唔係喎，子華有拍戲喎！」咁有冇喺Facebook（Fb）度寫先？冇吖嘛！子華點樣形容Fb？「唔係日記，係傳記！」喺呢個「扮工」世代，子華冇上網喺傳記上寫自己有做嘢，咁就等於冇做嘢(o架)喇！「返工嘅日子返咗工，因為受薪嘅原故，所以喺辦公時間替僱主做咗啲分內事」，即使比「星期一之後係星期二」更加冇point，依然足以建立「好勤力啊！」嘅假象，你估美國總統特朗普真係咁鍾意玩twitter？得閒佢唔好同身材索爆嘅第一夫人梅拉妮亞玩？佢因為清楚知道將來啲人討論佢任內有咩政績，咪就係睇佢網上傳記囉！子華Fb只寫食生日蛋糕，「蝕啦你」！
不過，若然子華都熱衷做埋啲咁「cheap、cheaper、cheaperer」嘅網絡自吹行為，佢就唔係子華神！更加唔會行年57，兼夾瘦蜢蜢，依然大受女性歡迎，不但有粉絲開post話「好想嫁給子華叔」，更加吸引唔少圈中花旦情願收平啲都恨合作，仲未計佢歷年來一段接一段「停不了的愛」嘅情史，淨係佢現任女友被封為「翻版范曉萱」，就知子華係幾咁魅力非凡！
不過舞台上口甜舌滑嘅子華，舞台下係另一個人，Nuts哥當年有幸同佢、吳鎮宇、張達明同枱打麻雀，你以為同得佢哋三個打牌，即係等於坐咗喺演藝學院歌劇院個舞台上面睇咗次《鬚根Show》？錯！子華係個打隻牌都諗成晚嘅人，望住佢摸隻牌返嚟，然後好似法國雕塑家羅丹嘅名作「沉思者」咁，進行一大輪前世今生嘅思想工作，你會明白點解打麻雀會被喻為擁有五千年文化嘅中國國粹，試問冇咁源遠流長嘅文化歷史，又點夠撐打到四圈呀！
睇名著影響一生
但即使子華幾漏氣，若果佢約你開枱，你會恨不得立即就掛8號風球，仲要唔好咁快落波，因為嗰個係黃子華！當然，子華恨睇書多過打麻雀，事關佢當年就係睇咗俄國大文豪杜斯妥也夫斯基嘔心瀝血之作《卡拉馬助夫兄弟們》，從中領悟人類原始的愛與恨及慾望，令本來立志傳教嘅佢，最終連教都唔信，呢個決定影響一生！咩書咁堅？一言難盡，就好似子華啲棟篤笑點樣影響咗唔少人嘅思想模式一樣，必須親身領略過先會知道，否則只會係每逢聖誕喺床頭掛隻襪，然後心掛掛「聖誕老人會送我咩禮物呢？」嘅純潔心靈，你送人禮物，你就係聖誕老人，就好似《卡》所講：「魔鬼並不存在，實際上是人創造了它！這也就跟創造上帝一樣！」
Nuts哥