惠英紅望拍喜劇圓創舉

憑電影《血觀音》榮登金馬影后的惠英紅昨晚以一身型格打扮，現身經理人公司英皇集團大廈出席慶功宴，一眾公司高層及老闆楊受成到賀，場面熱鬧。楊受成更送上驚喜，自掏腰包買了一條價值6位數字的鑽石頸鏈送給惠英紅，並親手為她戴上，又大讚這位影后絕對實至名歸，氹得惠英紅開心不已，即時翹實對方齊齊開香檳。她致詞時不禁說：「老闆同英皇都好旺我，入咗嚟就攞咗好多獎喇！」

預告請食飯

受訪時再被問到得獎心情，惠英紅說：「尋日仲喺台灣做宣傳，今日返嚟又要趕化妝整頭，未有時間去興奮。多謝老闆咁重手，條鏈好閃。（遲啲再慶祝？）後日要開工拍戲喇！不過依家搵緊酒樓，真係要請大家食番餐飯，今年攞金像獎嗰餐都未食，開咗工再夾吓期啦！（今年橫掃咁多個獎，大滿貫喎！）金馬獎一擊即中最開心，但唔可以咁講（大滿貫），當年我都冇攞過新演員獎。」

惠英紅喜獲楊受成送贈鑽石頸鏈。	鑽石頸鏈	惠英紅與霍汶希（右起）、楊受成、許佩斯及邵劍秋開心祝酒。

瞓身撐後輩

她得獎後曾表示自己「搵唔到錢」，更被爆以超低價接拍得獎電影，談到加片酬時，她坦言：「我好少理呢啲嘢，朋友多嘛，係要幫手嘅，同埋有啲戲要自己爭取，好似呢部咁，否則亦未必會揀到我。（今次只係收50萬片酬？）係，因為佢哋Budget少，好多場面嘢要拍。咁我都要搵食嘅，有啲戲會收正價，不過遇到新導演就要瞓身支持。（仲想挑戰自己乜嘢？）喜劇啦，自從《霸王花》之後都冇拍喇，如果可以憑喜劇攞影后算係一個創舉，咁我憑打戲攞第一個金像獎，今次又憑反派攞金馬獎，如果拍喜劇再攞就圓滿喇！」

文：影視組