胡楓86歲開紅館騷創最年長紀錄
藝人胡楓（修修）為迎接明年1月18日86歲生日，宣布明年2月舉行一連兩場「胡楓86破晒紀錄演唱會2018」，打破在紅館舉行演唱會年齡最高的藝人紀錄！昨午記者會上，修修由86位舞蹈員陪伴出場，一眾好友包括杜平、羅蘭及Joe Junior等現身支持，張學友、蕭芳芳和鍾嘉欣等則拍片恭賀，學友說：「契爺（修修）教曉咗我，只要生活檢點及健康，我仲可以唱多30年。」
緩步跑練氣
對於破紅館紀錄，修修坦言開心，但笑言自己「面皮薄」，不敢再碌人情卡邀請表演嘉賓，一切交由主辦方處理。問到會否邀請謝賢和曾江一齊睇騷？修修笑答：「梗係想，佢哋係識咗超過60年嘅朋友。」由於有兩劇在手，加上慈善活動，修修雖缺乏休息時間，但仍然有緩步跑練氣，毅力驚人！提到有百萬健身贊助，修修笑說：「86歲肌乜肉吖？想實啲啫。（上次個台有窿差啲跌，今次要求冇窿？）最多唔行囉，上次諗起都驚，下面係林憶蓮等上台，整到佢我成世唔安樂！」
修修又表示原想90歲才開演唱會，不過製作人何麗全着他「提前」舉行破紀錄，他笑說：「如果90歲做到梗係做，咁嘅年紀仲可以喺舞台表演係好難得。」
文：影視組