郭羨妮囡囡識Social唔驚受欺凌
郭羨妮昨日在大埔超級城出席活動時，表示近日忙於處理女兒升小一的事情，臨近派位日子，更緊張得心跳失眠，又指星二代搵學校一樣冇優待。對於近日有小一學生被欺凌新聞，她直言擔心但指女兒在朋輩中甚受歡迎，上跳舞班時猶如明星出巡。
43歲的女藝人郭羨妮（Sonija）2011年與內地導演朱少杰結婚，現育有五歲半的女兒Kylie，昨日她到大埔超級城出席《Afro Ken爆炸狗百變聖誕Party》活動，與新鴻基地產（中國）執行董事馮秀炎在多個展區拍照。Sonija身穿低胸兼露背裝，露前又露後艷光四射！
星二代冇優待
Sonija透露老公將於聖誕及元旦期間返港，計劃一家人到日本旅行，談到最近為女兒升小一的事情忙碌，她表示心情超緊張、心跳加速又失眠：「11月27號就有消息公布，好緊張，好似自己考咁，到時一定心跳好快，前兩日都瞓唔着（口架）喇！不過入唔到（第一志願）都唔緊要，最緊要讀得開心！（囡囡有冇緊張？）佢知自己要升學校，面試嗰陣冇怕醜，好好玩咁。」
問到藝人仔女到學校面試是否有着數？Sonija認為一視同仁，校方主要是根據小朋友的面試表現而決定是否錄取：「冇特別優待，公平對待，其實有幾次面試都即刻知唔得，惟有當係唔適合我個女。（有冇做啲咩催谷個女？）冇呀！平時同佢溫測驗，冇上面試班。（老公有冇拎假陪埋去？）唔使，我一個都OK。」
談到近日發生小一學童被欺凌的新聞，Sonija直言擔心，會跟女兒多傾偈，希望她主動向母親傾訴，但笑言女兒非常懂得Social，深得身邊人歡迎，相信不會被欺負：「有次我陪佢上跳舞班，佢一到場，個個都叫佢，我心諗咁似明星嘅？囡囡都話唔知點解，可能佢個人好玩啩！」
文：影視組