吳國敬愛的替身幫科林求婚

前新城DJ科林（原名吳浩賢）日前在Facebook公布結婚喜訊，並點名多謝吳國敬幫忙求婚。昨日阿敬接受電話訪問時透露，受范振鋒邀請幫科林向拍拖十年的女友Wing製造驚喜求婚。阿敬說：「嗰日科林嘅朋友打畀Wing，話科林撞咗車要急送院，叫Wing快啲趕去救護車睇科林。Wing係睇住科林戴住頸箍被送上救護車，不過我哋閂埋車門唔畀Wing上車住，呢個時候匿埋喺車頭嘅我就同科林換位，Wing一上車就撲埋嚟問我有冇事，我立即彈起身好大聲嚇佢話：『我係吳國敬，唔係吳浩賢喎！』我見到Wing標晒眼水，之後攬住個肚喺度大笑。」

同日註冊結婚

之後阿敬拖Wing落救護車，科林已換上西裝，鋪了紅地氈及擺好backdrop，向女友跪地送花及卡半方形鑽戒求婚，女友答允後全場起哄。阿敬大讚科林有心思：「科林好認真嘅，嗰部車係道具部租，三個救護員全部係演員，最好笑係揸車嗰個救護員十幾年前喺TVB都係演救護員。」阿敬又指收到科林的利是：「利是冇所謂，好戥佢哋開心，恭喜晒。」

科林（圖）被送上救護車，之後與吳國敬換位。	科林	科林出動到救護車及演員求婚，抵佢抱得美人歸。

新郎科林受訪時稱求婚後，即進行結婚註冊儀式，半日內完成人生大事：「因為我想驚喜一浪接一浪嘛，其實我籌備咗好耐，一早Book咗地方、買定女友鍾意嘅花同婚紗，叫埋兩家家人同最好嘅朋友見證我哋結婚，明年先再補擺酒，今次大約使咗十萬度。」提到吳國敬做「媒」，科林說：「因為大家都話我哋好似樣，我女朋友話第一眼望阿敬時都以為係我，但望真啲先發覺唔係。」

科林跪地求婚，全場起哄。	吳國敬（右）與科林真係幾似樣。	科林求完婚，即日和Wing簽字註冊。

靈感來自夢境

科林又否認奉子成婚，此求婚計劃純粹滿足自己。問到為何用撞車橋？他指靈感來自一場夢，夢中他和女友發生意外，他中槍後嚇醒，即覺得是條求婚好橋。可擔心女友當時不答應求婚？科林覺得有99％會成功。

文：音樂組