湯寶如開騷張學友聲援

歌手湯寶如（湯記）將於11月15日在九展Star Hall舉行「湯寶如獨愛音樂25週年演唱會」，昨日湯記舉行歌迷答謝會，即場演唱《緣份的天空》及《我和秋天有個約會》。距離開騷只剩兩星期，她稱：「進入最後階段，出席埋今日活動，相信到15號開騷先再見大家。」

湯記表示演出嘉賓名單已全部落實，更暗示「歌神」張學友擔任神秘嘉賓：「最開心係我最想請嘅一位嘉賓，終於日前我喺馬來西亞嘅時候，佢助手覆實可以嚟到。（係邊個？）我都係想保持神秘，佢同我都係寶麗金年代時嘅歌手，依家佢已經係殿堂級。其他嘉賓有陳曉東、黎瑞恩、曹永廉、薛家燕、黎小田、黃翊。」

問到萬聖節會否外出輕鬆一下？湯記表示：「唔玩喇，歌詞都未背掂，仲有好多嘢要記。想減多5、6磅，會節食減磅，都有信心減得切嘅。不過，之前喺馬來西亞時都忍唔住食咗碗喇沙，破咗戒。」之前湯記曾指兒子要考試，未必來捧場，她稱：「係呀，但都想佢嚟到，我有同佢講做完呢次25周年未必會再開。」

文：音樂組