熱爆ViuTV節目《晚吹－－－總有一瓣喺左近》深受歡迎，皆因「總有一瓣」靈異題材引起觀眾興趣。每集由三位主持潘紹聰、關寶慧及岑樂怡就不同主題，探討各種鬼靈精怪、不可思議之謎，剛出街新鮮熱辣的一集主題是「狐仙」，請來玄學家司徒法正來逐一剖析，踢爆有男星膜拜狐仙。

節目上，司徒法正表示他們通常叫「狐仙大姐」或「大仙」，不會叫「狐狸」、「狐仙」，「拜狐仙」在港亦不盛行，因為很多人覺得好邪門，所以拜了也不敢認，令狐仙更添神秘感。不過，他表示在台灣、馬來西亞與日本等東南亞地方好多人都膜拜狐仙，還留意到拜得多的人，兩堂眉會慢慢「戚」上去，感覺「妖冶」：「台灣狐仙堂通常朝早冇乜人去拜，一到夜晚就最多人，半夜都多，最緊要係靜雞雞去拜，因為大家怕畀人知道拜狐仙。」

司徒法正指有娛樂圈中人拜狐仙求人緣，不少台灣女星都直認膜拜，令演藝事業平步青雲，還踢爆指香港有圈中男星是其中一分子，因對方曾向他請教拜狐仙的方法，三位主持不停八卦追問是誰？不過，他堅持不開名，只形容該「大台」男星彈結他彈得幾好：「係後生嘅，好多女仔鍾意嘅，佢都有段時間，依家佢嘅發展都OK有啲成績。」岑樂怡衝口而問：「係咪最近有啲負面新聞？」但司徒法正不作任何反應，讓大家自行猜測。

岑樂怡在節目分享一件發生在朋友身上的異事，指該朋友一向有拜神及養鬼仔，家中養有一狗一貓，早前開始學拜狐仙：「佢兩星期後有一日返屋企，竟然發現隻貓冇晒啲毛、冇晒啲肉，得番棚骨喺度！佢懷疑隻狗食咗隻貓，但佢哋相處一直都冇問題，於是佢帶隻狗去獸醫度檢查，個獸醫一睇就話：『呢隻唔係狗，係狐狸！』仲話嗰隻動物成個構造都係狐狸。」其後，朋友求助一位師傅，師傅叫他放生「狐狸」，岑樂怡懷疑朋友拜錯狐仙。

司徒法正坦言拜錯狐仙會有一定危險性，節目中還講述供奉及拜狐仙的做法，奉勸善信求完、拜完一定要還願，指有人試過沒有遵守承諾，結果惹來健康的禍病死亡。主持又重談當年銅鑼灣某大廈雲石牆中狐仙顯靈事件，更是當年一時佳話的異事，潘紹聰詳述他聽說有酒樓高層放符咒鎮壓狐仙的事，令人嘖嘖稱奇。

《總有一瓣喺左近》

ViuTV 99台逢星期五晚11:30

10月27日晚主題：狐仙

（可於app & website重溫）

11月3日晚主題：佛牌

文：音樂組