陸詩韻衰心急衝燈 停牌邊緣焗上堂求「分」
已有11年駕駛經驗的藝人陸詩韻，自言為人心急常衝紅燈，於一年半內被扣剩4分，惟有上駕駛改進課程，有得攞分又可改善駕駛態度，但笑言要請司機。
陸詩韻昨日出席美容活動，表示剛上完駕駛改進課程，她有多年駕駛經驗，卻於年半內狂被扣分，由原本15分扣剩4分，上完堂多3分，現有7分，她說：「我個人好急，衝燈，所以冇晒啲分，強制性要上個課程，上堂9點上到6點，全班都係男性。」
問到會否找男友做司機？她笑言要請司機，男友要氹自己，現有了解中的男仔：「低調，因為有風水師話我感情要低調，以前高調都唔順利，但我唔會隱瞞，結婚會講，依家唔敢講住。（結婚計劃？）24歲嗰陣，想28歲結婚，30歲生仔，隨緣啦！唔生小朋友唔使結婚，如果要生，45歲生都好正常，唔排除閃婚。」
張文慈拒做醫學美容
同場的張文慈為貪靚長期到美容院護理，但不會做醫學美容及打針，她說：「每個人需要唔同，唔好偏離，太假。」問到會否開一間？她直言有人找她投資，但冇興趣做老闆，因為美容競爭大，自己不敢，只喜歡買樓投資：「安全啲，都係一般師奶。（小富婆？）唔係，唔好咁講，一層自己住，一層細佬住，最近都冇入市，兩年前樓價較低所以入咗市。」
文：名人組