張建聲20蚊度日苦撐暗黑期
張建聲入行六年，最近憑爆紅網劇「招積」一角，人氣飆升，但成功背後，也付出了不少代價。一度不能抽離角色的他，曾三度求醫，幸最終都能走出陰影！回顧過去的日子，原來張建聲曾度過一年「暗黑期」，冇工開零收入，要靠賒借度日，高峰期欠債數十萬，幸靠着堅強意志，再苦的日子最終也能捱過。
張建聲於網劇《反黑》中飾「招積」一角，演得十分出色，令不少內地網民對他加深了認識，有些網友更指他的角色像是吳鎮宇經典角色「(0靚)坤」的狂野版。對於備受讚賞，張建聲並無飄飄然：「嘩！同鎮宇嘅神級(0靚)坤真係唔能夠相提並論，好多謝觀眾咁喜歡套劇同招積呢個角色。」
睇精神科醫生
劇集播映十八日點擊衝破八億，然而成功背後卻付出不少，由於張建聲太入戲而無法抽離，影響情緒，要三度睇精神科醫生，幸最終得到黃秋生點醒加上自己想通，才走出情緒病的陰霾。
張建聲廿八歲才入行，至今度過六年，過程絕非一帆風順，拍攝電影《壹獄壹世界》之前，足足一年冇工開，陷入了「暗黑期」，他稱：「嗰陣要賒借度日，再加上爸爸患癌，個世界真係好灰。（最高峰欠債幾多？）都有幾十萬，醫療費加生活費，公司同朋友都好好，喺我艱難嘅時候幫過我。（嗰段日子係咪要好慳？）一定，一日用廿蚊，餐餐即食麵。」
山窮水盡已不易捱，還要面對父親離別，令張建聲一度崩潰：「我同媽媽去認屍，我拉開個簾，嗰一刻好難受，但都要忍住，先照顧好媽咪，之後再去搞爸爸嘅身後事。當我做晒所有嘢，返到屋企坐低，情緒就即刻爆晒出嚟，激動到打爆屋企塊鏡，好崩潰。」
生吞吳毅將
張建聲如今總算捱過來，他直言非常感恩，因身邊一直有一班好朋友及好老闆支持，令他捱過黑暗，繼續走演藝路。
另外，張建聲在劇中生吞仇人的演繹，令人毛骨悚然，他說：「場戲基本上冇對白，全部係即場望到『火屎』（吳毅將飾）嘅第一身反應，吳毅將做得非常好，堆砌到個恐怖感出嚟！」
文：影視組
Hair stylist: Simm Lui @ La mod salon
Makeup: Yvonne@yvonneamakeup
Venue: EMOH DESIGN
Outfit: @creamsoda