夜蒲傳緋聞 李雨陽讚樂觀唔覺有抑鬱

內地女藝人任嬌離奇墮樓,由於死因不明,事件極受外界關注,而2015年曾跟任嬌在香港中環夜蒲而傳過緋聞的李雨陽,現身在內地象山開工,對於任嬌離世大感惋惜,直言起初收到消息時,還覺得只是流言:「我16號聽到呢個消息,都唔敢相信係真,我哋一班認識佢嘅朋友都好擔心佢,依家證實咗,當然係覺得非常惋惜。(點認識佢?)都可以話因誤會而認識,記得2014年嗰陣,我喺內地拍網絡電影《海灘救援隊》,當時佢入咗劇組,但最後冇開到工,有傳聞話佢耍大牌,所以起初我對呢個女仔嘅印象都唔係咁好,但到後期正式認識,知道佢係好敬業同好勤力嘅女仔。」

2015年李雨陽曾跟任嬌在中環夜蒲而傳緋聞,問他跟任嬌是否曾拍拖?他說:「冇,當年佢嚟香港,我盡地主之誼同佢去中環飲嘢見面,冇發展到。(覺得佢係點樣嘅女仔?)佢好好同非常開朗,(傳佢有抑鬱?)咁呢啲隱性病唔會話見一、兩次面就知,當時唔覺得佢有呢個病。(傳任嬌墮樓前曾服藥?)呢樣嘢我唔相信。」