陳展鵬成過去 胡定欣想搵個人呵

視后胡定欣近兩年來劇接劇忙個不停,加上緋聞纏身,雖然事業達到頂峰,但感情方面仍然交白卷。隨着緋聞男友陳展鵬傳有新戀情,定欣亦加緊步伐,計劃趁工作空檔抖一抖,擴闊生活圈子多交朋友,期望緣分前來敲門,找到一個呵護她、照顧她的Mr. Right。

兩屆視后胡定欣的演藝生涯踏入第15個年頭,近兩年她在劇集《城寨英雄》與《同盟》中大展身手,去年更憑《城》劇封視后,為一線花旦立下新標準,就是女仔亦可以「好打得」!

定欣與陳展鵬在《城》劇火花四濺而傳緋聞,早前宣傳《同盟》期間再被炒熱,加上「前度」馬國明與黃心穎撻着,令她捲入緋聞中央!談到展鵬與單文柔發展中,定欣說:「大家都單身,好戥佢開心。我對緋聞一向都Relax嘅,工作同私人生活唔一定要掛鈎,相信宣傳過後,緋聞好快就會過去。(同展鵬昇華做最佳拍檔?)都係,《同盟》同《城寨英雄》好唔同,有好多對打戲,要對戲就位,仲要合力搞笑,或者監製再搵我哋拍檔,都會頭痕諗諗要搵乜新題材。」

對男友展現另一面

定欣事業登上高峰,在劇中接連大顯身手,平日又不時晒運動照,相信不少人都認為她是位擅長照顧自己的事業型女性,她笑說:「做得呢一行嘅女仔都好硬淨,多數時候都要自己照顧自己,可能大家覺得做藝人要好Strong,大家有咁嘅印象我係開心嘅,但其實我都有想人呵護、好Girly嘅一面,班姊妹都知我戀愛時會唔同晒。(叫姊妹介紹對象,宣揚吓你另一面?)有時間相處就會睇到我另一面。」

獨自旅遊搵緣分

定欣早前與Fans慶祝入行15周年、影迷會13周年及預祝36歲生日,談及Fans對她的感情生活非常緊張,她說:「冇得急喎!我都試過停低諗一諗,我以前覺得事業同感情可以同步進行,但呢兩年真係好忙,每日都係凌晨或朝早先收工,試問又點會拍到拖呢?我都想趁拍完《宮心計2深宮計》休息吓,去擴闊生活圈子,或者我真係需要識多啲唔同嘅朋友。(有冇初步計劃?)或者可以去旅行,我一直好享受一個人去旅行,相信緣分會有安排。」問到哪類型男士能吸引芳心?定欣直言:「男人最緊要有上進心,有清晰目標,照顧到另一半。(鍾情有才華嘅男士?)我好欣賞有才華嘅人,才華亦都係散發吸引力嘅一種方式。」

父母擔心人生大事唔敢追問!

談及感情生活,定欣罕有地提起家人,她說:「媽咪問我會唔會有時間識多啲朋友。(爹哋呢?)佢比較內斂,唔會講出口,但我知佢心裏面係想知嘅,佢會問其他屋企人我最近點,但佢哋都明白我工作嘅情況,所以唔會開口追問。媽咪好細心,知我做嘢辛苦會幫我準備湯水,我都盡量唔表現出辛苦一面,怕佢哋掛心。」

定欣感激父母一直讓她自由選擇:「見到爺爺嫲嫲好支持我演出,睇得咁開心,已經覺得喺事業上交到功課。(有冇信心今年再爭視后?)唔敢再諗,仲有好多同事做得好。」

六姊妹開劇有得諗!

定欣在《同盟》中與「胡說八道會」好姊妹姚子羚共同進退,她開心之餘,卻大呻唔夠喉:「對上一次同劇已經係2006年嘅《酒店風雲》,今次仲加埋好朋友陳山聰,我哋三個知道可以合作都非常開心。子羚嘅表現好有驚喜,原來佢同山聰可以咁Sweet,我哋會互相分享女仔點去演打戲,但其實對手戲唔多。」談及下次劇集或可加入黃智雯做對手戲,定欣即向各監製公開呼籲:「可以搵齊我哋6位胡說八道會姊妹拍套劇呀!好似《女人俱樂部》咁,一班女仔有唔同故事。我哋之間有太多經歷,如果可以帶入角色或劇情會好特別,雖然胡杏兒嘅情況可能要再傾傾,但相信有機會成事。」

《同盟》播出期間,網上流行一條選擇題:「揀胡定欣或姚子羚?」令一眾男士相當頭痕!定欣指子羚確實如劇中一樣「Girlfriendable」,她笑說:「佢不嬲好索、好甜美,一直好受男孩子喜愛,我哋都有研究呢個話題,子羚話會揀我,咁我當然係揀佢,所以係平手嘅!」

文:影視組

攝:張福宏

髮型:Jimmy Chan@Hair Culture

化妝:Miko Wong@Cyrus,s Team

服裝:Alexander Wang,Harvey Nichols