邵珮詩遊日玩直播呻冇仔撩

藝人邵珮詩（Veronica）、黃美棋、蔣怡及狄以達等，昨日於尖沙咀出席《big big voice大大聲》記者會，即場示範捽碟。今次是Veronica第三次玩捽碟，她說：「我記得第一次乜都唔識，用手指捽，捽到Gel甲都甩咗。」她透露之前有學打鼓，望有機會參與演出，又謂曾於big big channel直播與母親煮食及教對方打機。提到早前與家人去日本旅行時玩直播，她說：「因為我識日文，或者會喺big big channel教人。當地好多人都話我講得好，但係主要係老人家，冇靚仔讚我，可能我打扮似日本妹多啲，就會有男仔同我傾偈。」