師姐吳若希被爆粗 林穎彤照畀Like大覺瞓
藝員吳若希（Jinny）與「師妹」林穎彤（Bella）近日於無綫節目中碰頭，及後Jinny上載大合照到社交平台，有口痕網民留下粗口字句，但Bella卻被發現對該留言畀Like，引來二人不和之說。昨日Bella澄清只是一場誤會，並已立即向Jinny解釋！
林穎彤早前宣布加入星夢做歌手，成為吳若希師妹，之後便傳出Jinny一姐地位受威脅，話口未完，近日便傳出二人不和！Bella近日參與無綫節目《終極街頭魔法王》演出，最後一集請來Jinny客串，同場還有林盛斌（Bob）、甄澤權（Louis）等，Jinny事後將眾人合照放到社交平台開心Share，不過有網友卻以粗口留言「臭x」，沒料到Bella竟對此留言畀Like！
「我發誓唔會咁傻！」
本報昨日就此事求證於Bella，她於電話中呼冤：「尋晚Louis有問我係咪按錯掣，但我瞓咗唔知，今朝問佢我都唔知咩事，冇咁做過，我唔會Like一個鬧我師姐嘅留言。」更指特別為此主動向Jinny及老闆何哲圖解釋，Bella說：「其實因為張相有我，所以想Like張相，可能就咁揩到嗰個留言！我發誓唔會咁傻，我之後一定會小心啲，老闆知件事係誤會，Jinny亦都好明白，好多謝佢諒解，我真係冇意咁做，完全唔知有呢個留言。」
問到對Jinny印象如何？Bella大讚對方很Nice，即使於加盟星夢前，二人於電視城碰上也會打招呼，到與Jinny成為同門後，首次見面便是拍攝《終》，她指當日氣氛很好，與Jinny亦有閒聊。
文：影視組