林家棟開棺偷陪葬品向鬼王投降
金像影帝林家棟為經典港產片《陰陽路》拍攝20周年紀念作《常在你左右》，他坦言沒有參考前作，期望為觀眾帶來新鮮感。他認為恐怖片氣氛很重要，笑言自己不可能超越「鬼王」雷宇揚。
林家棟於驚慄片《常在你左右》飾演一名仵工，因爛賭而偷取雨僑的陪葬品變賣，導致厄運纏身，最難忘的是開棺攞龍鳳鈪一幕，他說：「雨僑個妝幾鮮又幾嚇人，我哋傳統着紅色衫係厲鬼，有冤冇路訴，見到佢覺得一啲都唔過癮同埋大壓力，其實係會驚同唔舒服。」由於角色是一名賭徒，他表示服裝花了不少心思，包括色調，更刻意將新衫磨到看似舊衫，連他也笑問劇組是否冇資金，所以要他穿舊衫。他坦言今次拍攝比較辛苦：「有場戲講我畀人追債同淋油，冇替身又冇得用Pad，導演想我硬做，兩Take一定要搞掂。」
唔睇前作怕入腦
《常》片是電影《陰陽路》系列20周年紀念作，家棟是首次參演經典電影系列，直言拍攝前沒有參考前作：「第一身參與會畀自己一種新鮮感，參考番之前19集驚會入咗腦，影響我點做。」又指導演不斷求變，每部驚慄片都有不同Style，應該不會有很多與之前相近的情節出現。至於可想成為新「鬼王」？他笑言不可能超越雷宇揚，反而想嘗試演喜劇及愛情片。入行近30年，家棟原來甚少拍驚慄片，他說：「咁耐以嚟大家覺得我拍警匪片多。（驚慄片？）我諗唔過四至五套，但我有幾套都係同邱禮濤合作。雖然經驗唔多，但有一定嘅默契，佢容許我有一個空間點去做，畀我發揮，呢樣嘢做演員最開心。」他坦言拍攝時會與導演商量，希望活化角色。
恐怖片重氣氛
家棟曾為電影擔任監製，問到可有考慮拍驚慄電影？他說：「我成日覺得恐怖片好難拍，因為恐怖片氣氛好重要，劇本我又唔知點去搞。《陰陽路》咁成功，唔可以差太遠，要同監製傾吓點拍，自己都想挑戰吓。」
文：影視組
攝：林蔚恩
服裝：A.P.C.
化妝：Esther Huang@J.A.C.K Factory
髮型：Alex Chan@projetz4/J.A.C.K Factory