許靖韻月供萬五靠慳「上車」

現今香港樓價高企，不少年輕人都擔心將來未能「上車」置業，但90後的英皇歌手許靖韻（Angela）最近與母親購入英皇集團旗下、價值500萬以下的一房單位，榮升業主！她坦言近年雖與母親有意買樓，但當日只打算齋睇樓，從沒想過會即時扑錘：「咁啱個籌好好，覺得有個好嘅機會，今次公司又包借，我哋覺得唔麻煩，又唔使拎好多錢出嚟先買！我哋都係拎咗一成出嚟。」

學識溝通爭取改歌路

因事出突然，Angela未決定可會自住，自言現時覺得忐忑及有壓力：「因為仲要供，一個月供萬五蚊左右，好似好長遠咁，但又唔係超級吃力嘅！我都希望我自己供晒，始終我後生啲，可以做嘢多好多。」她亦自認平日生活節儉，儲錢冇難度：「我係嗰啲買件衫都要諗幾次嘅人，同埋又唔會追名牌、使好多錢，係真係儲到錢嘅人。」

許靖韻自言歌路上有所改變，表現狂野一面。	供樓點都有壓力，幸好許靖韻過慣「慳妹」生活。	許靖韻當日諗住「睇吓啫」，點知一擊即中！

最近，Angela推出講述成長的新歌《琢磨》，希望鼓勵大家無懼地呈現自己最赤裸一面。她自覺在待人接物方面有最明顯的成長，透露加入公司頭兩年都不敢返公司，亦不會與同事傾偈：「我嗰時讀緊中學，嗰啲人全部都係大人，唔知點同佢哋溝通！嗰兩年好驚，但知道咁樣唔好，咁同事係唔知你諗咩同想點，所以喺揀歌、所有嘢會同佢哋有偏差。」Angela現時學會主動與同事溝通，近兩年的作品都能切合她的想法，年初時已與公司商討歌路及形象，方向非常明確：「之前幾年會唔知自己想點，但今年好明確，除咗音樂之外唔會諗其他嘢！我希望今年開始慢慢被認識到，感受到我係比較Wild啲、少少rock嘅一面，自己都會寫多啲唔同類型嘅歌。」

文：音樂組

攝：司徒國榮

化妝：Kandy L.

髮型：Veron Chan@Hair Corner

場地：Goobne Chicken@V Point