陳煒傷風「黑」到爆 岑麗香半夜（興）合合唔敢叫老公捽油
岑麗香與陳煒為新劇密密拍外景而不慎曬黑，齊齊為肌膚急救！香香更因拍打排球戲致雙手瘀青，但半夜才返屋企的她不敢勞煩老公捽藥油。而陳煒則忙到健康失守，笑言恨有時間瞓覺叉電。
藝員岑麗香、陳煒、黃浩然、何廣沛及黃建東等到油麻地果欄為新劇《果欄中的江湖大嫂》拍攝，新劇即將煞科，一班演員都顯得依依不捨。而近日陽光猛烈天氣炎熱，兩位女藝員帶備小風扇消暑，又做足準備力保靚樣，惜無可避免曬成黑美人。
香香在劇中以眼鏡娘可愛造型示人，吸引路人上前集郵。講到如何為肌膚急救，香香透露會把握休息時間搽Cream美白，她指早前拍攝一場打排球戲，除曬黑外更令雙臂瘀青，她說：「少少瘀啦！都唔影響拍劇，啲同事好有愛畀藥油我搽。（係咪拎返屋企叫老公強強幫手捽？）冇呀！好多時返到屋企都半夜。」
外遊唔造人
香香婚後忙拍《溏心風暴3》及《果欄中的江湖大嫂》兩套劇，忙足大半年的她坦言恨放假：「都開始期待可以享受屬於自己嘅時間！」講到應是與老公的二人時間？香香甜笑說：「都係，終於可以陪吓老公。（去旅行？）都朝呢個目標諗，不過去邊度就未知。（順便造人？）又未至於喎！二人世界先，放完假再諗！」
冇時間美白
而陳煒就透露除曬黑外，健康同時失守：「都傷風咗幾日，拍完劇集後又要做宣傳，應該要忙到11月底，莫講休息，搽Cream美白都冇時間，希望拍完劇就可以有多啲時間抖抖。」不過抱恙的陳煒未有跌Watt，更貪玩拎起榴槤與演果欄工人的黃建東一齊玩。
文：影視組