Eason開騷爆家事投訴老婆唔睬人

歌神陳奕迅（Eason）為新國語專輯《C'mon in~》展開全球共19場的《Eason says C'mon in~Tour》，其中香港站兩場前晚在旺角麥花臣場館開鑼。Eason先向老婆徐濠縈獻歌讚她好榜樣，但轉頭又爆老婆「唔多睬人」。對於門票被排隊黨瘋炒，Eason反向傳媒求助：「我可以點做呀？」

貪玩的Eason全晚High爆冇時停，更故意擺出騎呢表情任影。

久未在港開騷的Eason，兩晚音樂會門票極速售清，前晚頭場獲圈中好友梁漢文、郭偉亮、趙學而等攜眷捧場，太太徐濠縈亦坐台前支持。音樂會以新碟國語歌為主，但Eason好照顧香港歌迷，中段加插多首廣東歌，又特別唱了《人生馬拉松》給台下的老婆並說：「以下呢首歌都係好好嘅，我太太就係一個好好榜樣。」

邀歌迷入屋

剪短了頭髮的Eason自嘲似錢嘉樂，又瞪大眼學對方，引得台下觀眾大笑。他不忘叫觀眾站起來，教觀眾舉高手跟住跳，最抵死是故意擺出反眼及歪嘴樣讓傳媒任拍。Encore時，有歌迷說好想多見他，Eason就擺老婆上枱：「想咪嚟我屋企囉！不過要問我老婆先，但佢唔睬人o架！死啦，加重咗佢形象添，其實佢連我都唔係咁睬，講笑啫，咪咁認真。」