網民侮辱 谷住道氣！胡定欣呻完3粒鐘再搵姚子羚訴苦

陳山聰早前與一眾好友在卡拉OK慶祝生日，他上載與胡定欣的合照並留言：「哎呀老婆！感謝你的生日禮物！LOVE U！」想不到惹來網民留言侮辱！飽受負面評論的定欣終於大爆發，近日在社交網上發長文宣洩，明白公眾人物做每件事都會受公開評論，但反問是否每件事要都被評論：「何解要浪費時間去作帶傷害性的公開評論……」

心情大受影響的定欣，難怪要搵朋友吐不快！日前下午3時許，定欣獨自駕車離開將軍澳寓所，直駛附近一間酒店。身穿黑白間條衫的她落車後不時皺着眉頭，一臉愁容低頭撳電話，然後步往酒店餐廳會合友人。足足吐完3小時苦水後，定欣與女友人一起步出，期間仍雞啄唔斷，友人陪她傾到座駕旁邊才分道揚鑣。

訴苦前的定欣邊行邊撳電話，一臉愁容。	傾足3小時的定欣，離開時繼續與女友人雞啄唔斷。	定欣等埋好姊妹姚子羚收工，齊齊搭的士返歸。

閨蜜解畫：叫「老婆」係暱稱

不過，定欣似乎仍然氣難下，見她拎起電話錄語音短訊時怒氣沖沖，束起的辮子亦跟着她的身體擺動，最後自行駕車返歸。另一日約下午6時半，依然愁爆的定欣在電視城工作後，等埋「胡說八道」的好姊妹姚子羚收工，齊齊步出門外搭的士返屋企，繼續搵姊妹傾訴。

事後，問到姚子羚有否開解定欣，她接受電話訪問時說：「我都有叫佢唔好嬲，可能係因為啲留言真係超過底線，又可能唔係單一事件，其實大家咁叫（老婆）都係暱稱，我哋大家好好朋友，可能有啲人嘅留言令佢唔舒服！可能真係過咗佢底線，大家都明嘅。」

文、攝：追蹤組