李克勤愛打高球全程有水吹
歌手李克勤昨日以慈善大使身份出席「瑞銀香港高爾夫球公開賽慈善盃」新聞發布會，他透露愛打高爾夫球，更試過打到很癲：「之前我同老婆去加拿大，我哋試過一星期打14場波，食完飯再搵場打。」又試過搬到高爾夫球場附近住，與老婆盧淑儀打完波才返工。去年由校長譚詠麟擔任大使，問克勤可有信心打破校長去年為慈善活動籌得330萬善款的紀錄？他笑言：「我成日同校長一齊，我尋晚先同佢踢波，佢叫我盡量打破。」
恨攞金獎恨出面
受訪時克勤透露與太太都很愛打高爾夫球，老婆十多年前更考獲教練牌，但小朋友出世後因太忙而少打了，他大讚高爾夫球是最好玩的運動：「冇一個運動可以好似高爾夫球咁吹水吹咁耐，打4個鐘吹4個鐘。」
提到有指克勤今年將首奪叱咤男歌手金獎，他笑言：「有咁嚴重咩？冇諗呢啲，讀書不是求分數……就假嘅，但交畀公司處理，我哋喺前線盡量做好工作，有就開心，冇就戥人開心，我年頭都講過會出席頒獎禮，無論咩成績都會出席。」近年愈來愈少歌手出席頒獎禮，問到沒甚麼對手可覺場面冷清？克勤即說不清楚，因已幾年沒有出席。
為巡唱押後致歉
談到他與容祖兒本於10月初在澳洲舉行巡唱，但突然延期至明年2月，對此克勤表示是其中一個主辦出了問題，他向歌迷致歉：「大家都唔想，知有啲香港歌迷特登飛去嗰邊睇，所以唔好意思，對我嚟講就突然多咗幾日假期，喺屋企砌LEGO。」最近他為之前的演唱會剪片，希望12月推出演唱會專輯。
文：音樂組
攝：劉斌