軒仔險甩褲 Ivana醒目遮醜
靚聲之人張敬軒與王菀之前晚在澳門開騷，當中部分造型經重新設計，軒仔更自爆為穿窄身褲而剃腳毛，其後他在演出時差點當眾甩褲，非常牙煙，幸好王菀之醒目擋着他，為他「遮醜」。另外，兩人身形比起2月香港站時有落差，全因狂食致減肥失敗。
歌手張敬軒與王菀之（Ivana）前晚再度合體，在澳門金光綜藝館舉行演唱會，除了獻唱之外，兩人在台上互窒亦成為亮點。演出期間，軒仔險些當眾甩褲，幸得Ivana醒目為他遮擋，讓他弄好褲頭再演出。軒仔表示唱歌時，突然聽到褲子傳來「啪」一聲，笑言以為自己甩褲，Ivana聞言即說：「你咪賴條短褲，之前你着係鬆，依家窄到你坐低唱，我都聽到爆線聲，好在我遮住你。」軒仔趁機反擊笑Ivana肥：「你點止遮住我，成隊Band都畀你遮到啦。」
狂食發福減唔切
軒仔在演唱會中段提到今次部分造型是全新設計，更自爆為穿窄身褲而「剃毛」：「係呀！我今日冇晒啲腳毛，為咗呢條褲，我花咗成個鐘剃晒啲腳毛，因為條褲好窄又多拉鏈，經常夾到啲腳毛，所以要剃！」之後二人到台下跟觀眾握手，不少粉絲由座位衝到台前，期間，軒仔被觀眾搶咪而不慎撞傷嘴唇，他笑指支咪比自己重要，所以角力期間撞到，幸無大礙。
騷後受訪時，軒仔表示他們近日身形「大隻咗」，Ivana笑說：「我大隻咗係因為健身，其實二月香港站演出臨近農曆新年後，我已經開始戒口，應承設計師唔會大食，但我由紅館完騷後食到依家，所以減唔切。今次澳門站適逢中秋節，我食咗好多月餅！」另外，軒仔大讚兩人演出狀態理想，希望繼續有其他巡迴演出。
文：音樂組