黃心穎一眼關七出手扶路人
無綫花旦黃心穎日前趁不用開工，獨自往銅鑼灣行街，期間在街頭見到有名婦人不小心仆倒，即化身「愛心穎」急急上前扶起對方慰問一番！心穎人又靚、心地又好，稱得上是「絕世好女友」，與出名孝順的馬國明襯到絕！
現年28歲的黃心穎與43歲馬國明的緋聞傳出多時，雖然未正式公開戀情，但拍拖早已是公開的秘密，早前更有指他們在將軍澳物色愛巢計劃同居，可見兩人感情穩定。
日前下午6時，心穎趁住不用開工，撇甩「男友」單拖駕車往銅鑼灣行街，泊好車後，戴住黑超、全黑打扮的心穎，先往咖啡店買飲品，然後拿着外賣咖啡邊行邊飲。當時街頭有一位婦人突然差錯腳不小心向前仆倒，雙手雙膝趴在地上，心穎雖與該婦人相距約4米，但她依然一眼關七，並即時「愛心穎」上身，身手敏捷地衝上前把對方扶起。
目送離開
雖然當時婦人已可慢慢自己起身，但愛心爆棚的心穎仍然不停慰問對方，婦人亦尷尬地說：「冇事，冇事，唔該晒！」心穎睇住婦人自行轉身離開後，才安心繼續到附近商場行逛。貴為港姐亞軍的心穎，除了有美貌，還擁有一顆善良的心，與孝順仔馬國明確實非常匹配！
文、攝：追蹤組