陳家樂放蛇亂捐玩謝林夏薇

膽生毛的陳家樂，同蛇仔玩對望。

日前他拍外景時「冒死」徒手捉蛇，嚇得拍檔林夏薇（薇薇）及糖妹花容失色喪尖叫！談到家樂如此大膽，薇薇笑說：「我真係好驚蛇o架！本來同監製傾好咗唔使掂，但埋位時都企到好近。家樂好似唔驚，起初攞條假蛇掟埋嚟，拍嘅時候佢捉唔實蛇袋個袋口，搞到條蛇先後捐咗入小巴底同草叢！嗰日最終拍到嚴重超時，天黑先收工。」

為求效果逼真，劇組日前又安排家樂及陳山聰即日來回內地，拍攝一場日軍打仗戲，向來捱得的家樂亦不禁說：「嗰晚喺香港收工，即刻安排車畀我哋去內地，拍完又緊接返嚟再開廠。」

糖妹（左起）、林夏薇、陳山聰與陳家樂，開工時氣氛融洽。	陳家樂又要玩蛇，又要深入森林取景，非常刺激！	麥子樂（右）谷出「老鼠仔」，與陳家樂鬥Chok。

森林取景變泥鴨

來去匆匆令家樂高呼狼狽：「我哋根本冇時間準備隨身用品，本來諗住去到喺附近買，點知拍攝地點喺森林，連電話信號都收唔到！拍到凌晨4、5點終於搞掂，但我同山聰唔小心踩咗落個氹度，變咗泥鴨，惟有要求工作人員幫我哋搵間賓館沖涼，全程好狼狽，好難忘！」同公司的麥子樂亦抽空探家樂班，夠晒好兄弟！

文：影視組