張瞻暖男餵麵包 謝安琪全家打賭 睇好囡囡先叫爸爸

張繼聰、太太謝安琪（Kay）和囝囝張瞻及張父前晚齊為囡囡張靖（Karina）慶祝半歲大，同場加演「兄妹情深」，張瞻親餵妹妹食麵包，三代同堂溫馨到痹！阿聰在社交網大讚囝囝對妹妹溫柔外，又感激太太24小時照顧家人。

昨日Kay接受電話訪問，大讚囝囝生性，父母倍感安慰：「囝囝知妹妹六個月大吞嘢唔叻，就話搣小小麵包畀妹妹食，佢好細心搣到（麫包）細到冇可能啃親嘅地步，睇得出好疼錫妹妹，又幫妹妹抹手、抹口水，呢啲我冇叫佢做。」問Karina是否仍食人奶？她說：「一路餵緊，仲好努力。」

半歲「健談」BB

Kay指Karina屬「健談型」BB，常會發出不同的單音，相信很快識叫人，現一家三口更打賭誰是女兒金口中的幸運兒，Kay開心說：「有時問囡囡咁夜唔瞓等邊個時，囡囡就話『爸爸』，當肚餓或眼瞓就嗌：『孖me』，又試過叫（張瞻）『咯咯』，但覺得佢似『撞口神』。」問是否阿聰最有機會跑出？Kay直認：「我都覺得係，佢叫爸爸係肉緊啲嘅，媽咪講過一兩次，爸爸係出現得最多嘅，爸爸做嘢辛苦，第一個叫爸爸都值得嘅！」

張繼聰辛苦賺錢養起頭家，當然期待張靖叫爸爸！	張瞻細心搣碎麵包餵畀妹妹食。	爺爺同兩個寶貝孫合照，溫馨滿瀉。

影相角度女變仔

談及Karina愈大愈似哥哥，Kay覺得是攝影問題，在她眼中女兒有「女仔樣」：「唔知點解，阿聰影親佢都好似男仔咁，可能求快手啦，但我影佢又變番女仔，咁媽咪影相有心機，真係冇計，攝影師嘅功力唔同。」強調囡囡樣子是甜美版張瞻。

文：音樂組