「小小馬國明」獻吻 黃心穎冧爆甜笑

藝人黃心穎昨日以吊帶低胸衫襯紅色長裙到九龍灣出席活動，微露事業線及纖腰的她獲大會安排小男孩以「小小馬國明」身份獻吻，心穎笑得燦爛，甚為受落。心穎被問到性感打扮要不要給馬國明過目？她說：「好低胸咩？最近瘦咗，騷吓腰，但我諗我嘅時裝觸覺好過馬國明少少！嚟緊想換車，依家呢架揸咗兩、三年，係時候換。（同馬國明情侶車？）唔會啦，但我未諗定換咩車，我都係供車啫，唔係一次過畀晒！（『小小馬國明』獻吻好受落？）個小朋友好好笑，後生咗又縮細咗！（你話小朋友冇天然呆，有咩暗示？）天然呆係好事嚟！我對個小朋友唔住就真，要錫一個咁大嘅姐姐塊面喎！」