林允米蘭晒V 快閃睇騷
【陳嘉敏、劉智源米蘭直擊】「星女郎」林允「胸」降米蘭時裝周，於當地時間23日以低V外套配長褲示人，罕有地騷成熟性感。首次出席米蘭時裝周的她來去匆匆，只看一場騷，她說：「好期待，我只留一天便要走，都以工作為主所以沒有安排甚麼節目。」內地女星王麗坤及張儷亦於同日出席Jil Sander時裝騷。
苟芸慧性感得把聲
同日出席Blumarine 2018春夏騷的藝人苟芸慧仍帶病在身，雖然身體不適但非常開心，因可以見到不少潮人與名模，又跟品牌設計師見面，她聲沙沙說：「我覺得把聲今日好性感，充滿磁性！呢幾日太忙，都冇時間睇醫生。」她又透露今次米蘭之行巧遇內地粉絲：「冇諗過嚟呢度都撞到粉絲！佢哋幫我影咗好多相放上網。」返港後則要處理私人事務，因有太多朋友生日，年底會拍攝電影。
至於身在比利時賽車的苟芸慧男友陸漢洋，參與歐洲最高水平的勒芒衝刺盃耐力賽，最後獲得第八名。提到女友撒嬌指男友不在身邊便病倒，陸漢洋笑說：「冇女友喺身邊，冇咗幸運女神所以贏唔到。」透露賽後便到米蘭會合女友。
