薛家燕錫晒未來新抱
將娶新抱的薛家燕指拍攝無綫劇集《燦爛的外母》時對婆媳關係有所啟發，認為最重要是用心錫對方。不過，劇中要提起中氣狂鬧人的她卻吃不消，鬧完人反而自己心口翳翳痛。
無綫藝員薛家燕相隔兩年再拍劇集《燦爛的外母》，飾演性格執着、堅持己見的麻煩外母，獨力撐起荳品廠的她與執行改革的女婿黎諾懿鬥爭一番鬧出笑話，但後來又因事故令家人團結，笑中有淚。
薛家燕快將娶新抱做奶奶，今次拍攝關於外母與女婿間衝突的題材，對將要面對婆媳關係的她亦有啟發，她說：「今次角色係反面教材，睇完劇大家會知道點樣可以家和萬事興，退一步可以減少好多家庭問題，諗嘢唔好鑽牛角尖。」她又指與未來新抱相處得好好，大讚對方抵錫，她說：「最緊要用個心去錫對方，未來新抱好乖，喺我拍劇期間好窩心煲湯畀我飲，又提我個仔幫我買散熱貼，好細心！佢Daddy、媽咪教得好好，好抵錫。」
鬧人鬧到心口痛
薛家燕指角色不時要提起中氣鬧人，加上天氣酷熱，拍攝時中暑病足一星期，拍攝過程相當辛苦，難怪她笑言要休息一年才考慮再拍劇，她笑說：「角色好惡，要提起丹田氣去講對白、鬧人好攰，拍三、四個鏡頭拍到面紅耳熱，鬧人原來咁辛苦，要用中氣嗌出嚟先似。鬧完人返屋企都心口痛，可能激動過頭、太投入，翳住翳住咁，當時都諗使唔使去睇吓個心臟呢，好彩休息之後又冇事。」
文：影視組
攝：林蔚恩